Shillong, Naiwieng,19: Mynta ka sngi, la dep wanrah iaka Digital Transport Citizen Services bad ka e-Challan System, Online Application Portal na ka bynta ki EV Subsidies bad la dep soi iaka MoU bad ka SaveLIFE Foundation khnang ban pynskhem iaka jingshngain ha ka surok.
Ka Digital Transport Citizen Services bad ka e-Challan System kan pynsuk iaki lad treikam jong ki kali, ka treikam bha bad ba suk na ka bynta ki nongshong shnong, ha kajuh ka por ban pynkhlain iaka jingshai bad ka jingkitkhlieh ha ka jingpyntreikam iaki ain.
Katba ka Online Application Portal na ka bynta jong ki EV Subsidies kaba hap hapoh ka Meghalaya Electric Vehicle Policy 2026 kan ai lad iaki nongshong shnong kiba biang kyndon ban pan jingiarap pisa na ka bynta ki kali electric (EV) lyngba ka online ha ka rukom kaba suk, da kaba pynsting iaka rukom treikam bad pynshlur iaki briew ban pyndonkam khambun da ki kali electric.
Lem bad ka jingioh kumba T. 25,000 na ka bynta jong ki nongthied iaki EV bad bad ka jingmap noh iaka bai registration kali, dang treikam ban wanrah iaka Meghalaya kaba khuid, kaba jyrngam bad kaba neh slem.
Ka MoU bad ka SaveLIFE Foundation ka thmu ban pynkhlain iaki jingtrei pynneh jingiada ha ki surok hapoh ka jylla da kaba pynkiew iaka jingsngewthuh, ka bor treikam jong ki shlem, ka jingpyntreikam iaki kyndon bad ki jingtrei kiba shong nongrim ha ki sabut ne jingwad bniah.
Ka thong hangne ka long ban pynhiar iaki jingjia aksiden ha surok, ban pynim iaki mynsiem bad ban seng iaka jinglong jingman ban pyndonkam surok da kaba don jingkitkhlieh ha kawei pa kawei ka jylla Meghalaya.




