Shillong, Naiwieng 19: Ka Join Coordination Committee kaba kynthup iaka Federation of Khasi Jaiñtia and Garo People (FKJGP), Hynñiewtrep National Youth Front (HNYF), Ri-Bhoi Youth Federation (RBYF), Jaintia Students Union (JSU), Garo Students Union (GSU), A-Chik Youth Welfare Organization (AYWO), Association for Democracy and Empowerment (ADE), and the Federation for A-Chik Freedom (FAF), All A-Chik Youth Welfare Society (AAYWS) & A-Chik Holistic Awakening Movement (AHAM) ka pynrem jur iaka jingkren laplah jong u Bah Prestone Tynsong uba dei ruh u Deputy Chief Minister jong ka sorkar jylla pyrshah ia ki nonghikai kiba pynlong iaka jingiakhih hapoh jong ka shatri Khasi-Jaintia Deficit School Teachers’ Association (KJDSTA) da kaba kynnoh ba kidei ki ‘kruiñ bad ki sohpyut’.
Katei ka jingkren laplah jong u Bah Prestone Tynsong ym tang ba kala pynhiar kyrdan ia ka saiñ pyrkhat bad ia ka kyrdan jong u hi kat u Deputy Chief Minister jong ka sorkar jylla hynrei kala ktah iaka burom bad ka ijot jong baroh ki Nonghikai kiba ai ia ka jingshakri bad kiba don ha ki jylli bapher bapher naduh ki Skul, ki College & University ruh kumjuh.
La ong ba ym tang katta katei ka jingkren jong u Bah Prestone Tynsong kala pynmong ym tang iaki Nonghikai hynrei wat ia ki kmie ki kpa jong ki khynnah skul bad samla pule haka jylla kaba la ktah mationg hi ruh ia ki paid nong shnong shnong jong ka jylla kiba la sakhi ia u synñiang u bynhei jong ki Nonghikai kaba ki la noh sha ka imlang ka sahlang bad sha ka Jaitbynriew jong ka Jylla hi baroh kawei.
Na ka liang jong Ka Join Coordination Committee (FKJGP, HNYF, RBYF, JSU, GSU, AYWO, ADE, FAF, AAYWS & AHAM) ka dawa mardor na u Bah Prestone Tynsong, Deputy Chief Minister jong ka sorkar jylla ba u dei ban panmap mardor na ki Nonghikai bad hakhmat jong ki Paidbah jong ka jylla hi baroh kawei ia katei ka jingkren laplah da ki kyntien phlan duman pyrshah iaki Nonghikai kiba la long kiwei na ki paia khnong ban kyntiew iaka jing nang jingstad, ia kaba kum ki paidbah wat ka kylleng ki ri jong ka pyrthei ruh kila ju ñiew burom ba ka kam nonghikai kadei ka kam kaba donburom tam hakhmat jong ka pyrthei bad lada u Bah Prestone Tynsong um nud ban panmap ka pawshai ba u dei hi ma u uta u ‘kruiñ bad u sohpyut’ hakhmat jong ka jylla hi baroh kawei, la ong u bah Kitboklang Nongphlang Vice- President FKJGP Central Body.




