Shillong, Naiwieng 19: Mynta ka sngi 19/Naiwieng/2026 ka kabinet ha ka jingialang kaba la long kala shim Phra tylli ki rai bad kita ki long ka Meghalaya Clinical Psychologies Service Rule, ka Meghalaya Occupational Therapist Service Rule bad ka Meghalaya Family Welfare Education Service Rule.
U myntri rangbah ka jylla u Conrad K.Sangma haba kren ha ki lat pathai khubor hadien ka jingialang jong ka kabinet u la ong ba ha kitei ki lai tylli ki tnat trei kam ka sorkar kala don ka jingdkoh ha kaba iadei bad ka rukom treikam namar ba kam don ka service rule, namar dei ha ka service rule kaba la batai ia ka rukom treikam ha kaba iadei bad ka jingkiew kyrdan ki nongtrei.
Namar ka jingbym don ki service rule ha kine por kiba la leit ia ki nongtrei la hap ban shu bud ia ka rukom treikam la kum kiba trei shipor dei na kane ka daw ba ka tnat Personal kala bthah ia baroh ki tnat sorkar ba ki dei ban don ia ka service rule khnang ba kan shai ha kaba iadei bad ka jingtreikam ka tnat sorkar.
U myntri rangbah u la iathuh ba ka kabinet kala pdiang ruh ban wanrah ia ka jingpynkylla ia ka rule kaba 10 ka kyndon kaba nyngkong jong ka Meghalaya Registration of Birth and Death Rule 1999 bad katkum kane ka rule ka long ba lah ban register haduh khatsan snem naduh ka sngi kaba kha bad khlad kane ka dei ka ain jong ka sorkar pdeng kaba la pyntreikam ha baroh kawei ka Ri India hynrei dang shen kala pynjlan shuh sa san snem kaba mut lah ban register haduh ar phew snem.
Kawei pat ka rai kaba ka kabinet kala pdiang ka long ban don noh tang kawei ka rule ha kaba iadei bad ka jingpynrung kam ha ka tnat pulit bad ka jingpynthymmai hapoh ka Central Recruitment Board, ha kane ka board la dang pyniar ia ka jingtreikam.
U myntri rangbah u la pyntip ruh ba ka kabinet kala shim ia ka rai ban thung ia ka Meghalaya Sixth Pay Commission bad ia kane ka Commission yn khlieh da u Chief Secretary ba la shongthait u bah D.P. Wahlang kiwei pat ki dkhot kin long u bah T. Lyngwa bad u Ambrose Marak.
Ka sorkar kala ai por phra bnai ban pyndep ia ka jingpynkhreh ia ka kaiphot bad ia ki kyndon treikam la don ha ka jingpynbna, na ka liang ki nongtrei ki don ka jingsngew bad ia kita ki jingsngew yn phah sha ka Commission bad ki ruh ki lah ban leit ia kynduh ia ka Commission bad kala don ruh kiwei kiwei pat ki rai.





