Shillong, Naiwieng, 21: Ka Richa Kulkarni, IAS, Director of School Education and Literacy ka sorkar Meghalaya kala bthah sha baroh ki skul District School Education Officers bad Sub-Divisional School Education Officer ban pyntip ba ka sorkar kan khot iaka jingialang iaki nonghikai skul Deficit Grant – in – Aid ha ka 30/Naiwieng/2026 ha MMTA Conference Hall jong ka DERT Annex ha Malki.
Da kane ka shithi, la bthah iaki DSEO bad ki SDSEO ba kin pyntip sha baroh ki skul kiba hap hapoh ka Deficit Grant- In -Aid kiba hap ha ka jingpeit ka jong ki ban bthah ia kito ki skul ba kin phah san ngut na kawei ka skul sha kane ka jingialang ban iakren ha kaba iadei bad ka jingdawa ka jong ki.
Namar ba ia mynta, ka eksamin jong ki khynnah ka dang iaid shakhmat bad ban kut ha ka 27/Naiwieng/2026 khnang ban nym thut ka eksamin jong ki khynnah ia kane ka jingialang, la buh ban pynlong noh ha ka 30/Naiwieng/2026 ha kaba la bthah ba kin phah san ngut ki nongmihkhmat na kawei kawei ka skul Deficit sha ka jingialang.
Na ka liang jong ka Director kala bthah ba iaki kyrteng jong kito ki ban wan sha kane ka jingialang kin pynpoi noh ha lane shuwa ka 27/Naiwieng/2026 bad iaka bai leit bai wan bad ka bai sngi jong ki nonghikai kiban mihkhmat iaki skul ka sorkar kan siew katba dei ka bai lynti.





