Shillong, Naiwieng 20: U myntri rangbah ka jylla u Conrad K. Sangma haba kren ha ka jingialang kaba ar sngi kaba la tip kum ka Responsible Tourism Summit and Awards 2026 kaba la pynlong da ka tnad jngohkai pyrthei da ka jingiatreilang bad ka Outlook Traveller ha Shillong.
Ha ka jingkren u myntri rangbah u la ong ba ka lynti kaba kumno kila iaid ha kine ki phra snem kiba la leit haba ia dei bad ka kam jngohkai pyrthei ha kane ka jylla bad ka sorkar kala ithuh ia ka kam jngohkai kum kawei ka bynta kaba kongsan kaba don ia ka lad ban kiew.
Kane ka kam jngohkai pyrthei ka dei ka bynta kaba lah ban kyntiew ia ka kamai kajih ia ki briew bad ka dei ka bynta kaba lah ban plie sha ka pyrthei baroh kawei bad kan long ka lad ia ki nongwan jngohkai na kylleng ka pyrthei ba kin ioh ia kaei kaba ka jylla ka don.
Da kane ka rukom pyrkhat ka sorkar kala sdang ban pyntreikam ia ki katto katne ki bynta bad kum ka sorkar ka sngewthuh shai kdar ba nym wan rah ka jingkylla kaba mar mar bad ka sorkar ka kwah ban don la ka kyrteng na ka bynta ka jylla ha kaba ki kwah ba ka pyrthei kan tip ia ka kyrteng kaba ka don.
Ka sorkar ka tip shai ba kan nym lah ban urlong tang ba don kawei ka jingialang, kawei ka jingpynlong ia ka jingrwai ne ban plie kawei ka Five Star Hotel, hynrei haba shim lang ia ki baroh bad dei ban pynlong man ka por bad haba leh ia kata hap ban don ka jingiatreilang jong baroh.
Haba ka sorkar ka pyniaid ia ki sha khmat ki paidbah ruh ki dei ban ioh ia ka jingmyntoi kum ki Home Stay, Prime Tourist Vehicles, kum ki dukan kiba don harud surok ka sorkar ka ai jingiarap ba kin pynbha ia ki dukan.
U myntri rangbah u la ong ba ka long ka jingsngew sarong ba ka BBC kala buh ia ka jylla Meghalaya ha ka thup jong ki 20 tylli ki jaka haka pyrthei kiba khring ia ki nongwan jngohkai pyrthei na ka bynta u snem 2027.




