Don ka jingialang ki jylla ka thain mihngi kumno ban pynkhlain ia ka rep

Shillong, Naiwieng, 20: Ka tnad jong ka rep ka riang bad ka bha ka miat jong ki nongrep, sorkar India, kala pynlong iaka jingialang paidbah halor ka skhim jingpynkhreh rep kaba la pyniaid da ka tnad ka rep ka riang ha ka 17/Naiwieng/2026 ha Courtyard by Marriott, Shillong.

Ha kane ka jingialang la wan ban ia shim bynta da ki nongmihkhmat na baroh ki jylla ka thain shatei lam mihngi ban iakren halor ka jingiaid shaphrang, ka jingpyntreikam bad ki jingkyrmen na ka bynta ka lawei jong kane ka skhim hapoh ka thain.

Kane ka jingialang ka la ai iaka rynsan kaba kongsan na ka bynta ban khmih bniah iaka jingpyntreikam iaka AIF Scheme ha baroh kawei ka thain shatei lam mihngi da kaba iakren pynleit jingmut ha ka jingiaid shakhmat jong ka jingmynjur iaki projek bad ka jingpyllait iaka ram, ka jingiatreilang bad kiwei pat ki prokram jong ka sorkar bad ki jingeh ba kyrpang kiba la iakynduh da ki jylla.

Katba bun ki nongmihkhmat na ki jylla bapher bapher kila sam iaki jingshem jong ki, kila kdew iaki jingeh ha kaba pynurlong ia kane ka skhim bad kila wad iaki lad ki lynti ban pyniar iaka jingioh bynta bad ban pynkhlain iaka jingtreikam jong ka.

Kane ka jingialang kala kut da ka jingban jur biang ban pynkhlain iaka jingiatreilang hapdeng ki tnad treikam bad ka jingiashim bynta lang ban pynsted iaka jingpynlut pisa ha ki jingdonkam ba kongsan na ka bynta ka rep ka riang ha baroh kawei ka thain shatei lam mihngi.

La kdew shai iaka bor bad ka jinglah kaba khraw jong ka AIF Scheme ban pynkhlain iaka jingpyniaid hadien ka jingot lane kheit iaki mar rep, ban kyntiew iaka jingpynjanai bad pynkiew dor iaki mar, ban pynjanai iaki lad jingiadei bad ki iew ki hat, bad ban tei iaka rukom rep kaba khlain bad kaba lah ban ieng rasong na ka bynta ka jingmyntoi jong ki nongrep bad kiwei pat ki nongiashim bynta.

Ha kane ka prokram, la don u Timothy D. Shira, Myntri ka rep ka riang bad ka bha ka miat ki nongrep, sorkar Meghalaya, kum u kongsan, ha ka jingiadon lang u Anbalagan P, IAS, Joint Secretary (AIF), tnad ka rep ka riang bad ka bha ka miat ki nongrep, sorkar India, u Gavade Sachin Shankar, IFS, Additional Secretary, tnad ka rep ka riang bad ka bha ka miat ki nongrep, sorkar Meghalaya.

U Goonjan Kumar, Joint Director, tnad ka rep ka riang bad ka bha ka miat ki nongrep, sorkar India, u bah S. Rani, Director ka rep ka riang bad ka kong M. Dkhar, Director ka rep ka riang (R&T), tnad ka rep ka riang bad ka bha ka miat ki nongrep, sorkar Meghalaya. La don ka jingiashim bynta lang ki nongmihkhmat jong ka NABARD bad kiwei kiwei.

What Next?

Recent Articles

Leave a Reply

Submit Comment

*