Shillong, Naiwieng 20: Ka Jaiñtia National Council (JNC), Central Executive Committee, hapoh ka jingïalam jong u General Secretary jong ka, u bah Wanshwa Suting mynta ka sngi 20/Naiwieng/2026 kala ai ïa ka jingujor sha u Principal Secretary ka tnad Forests bad Environment ka sorkar Meghalaya lyngba ka Personal Assistant jong u namar ba um don ha ophis.
Ka Council kala pynpaw ba hadien ba ka la ïoh pdiang ïa ki jingujor na ki nongshong shnong jong ka Jaiñtia Hills ha kaba ïadei bad ki dor thung dieng ba la pynthymmai (revised nursery sapling rates) ba la pynrung lyngba ka hukum jong ka tnad khlaw kaba la buh ha ka 1/Jymmang/ 2026, ha kaba la shim bai thung dieng wat na ki riew paidbah, ki kynhun paidbah bad ki jaka pule.
Ka JNC ka la kyntu jur ïa ka sorkar ba kan pyrkhat biang bad weng noh shisyndon ïa kane ka hukum khamtam sha ki paidbah, ki samla pule, ki skul, ki kolej bad kiba bun jong ka imlang sahlang, khamtam ha ki jaka ba shah ktah ha ka jingtih ia u mawshun, dewiong bad ha ki jaka ba la pynsniew dur ïa ka mariang ha Jaiñtia Hills.
Ka Council kala buh jingkylli balei ba ki nongshong shnong bad ki samla pule kiba kwah ban thung dieng bad ban noh synniang ban pynbha pynmiat ïa ka mariang ki hap ban siew na ka bynta ban ïashim bynta ha ki kam kiba bha ban pynïaid shakhmat ïa ki jingthmu jong ka sorkar ha ka liang ka jingpynbha ia ka mariang.
Ka Council ka la pynpaw ïa ka jingsngewkhia ba ka sorkar ba la ïalam da ka NPP ka long thik kum ka “Sorkar Kruin” kaba pynduhjait bad leh sngap jar ïa ka hok, ka lad bad ka lawei jong ki briew kiba don ia ka mynsiem pynbha mariang, khamtam eh ïa kiba duk bad kiba kiba don jaka ban pynbha pynmiat khamtam kito kiba shah ktah na ki par dewiong lyngba ki polisi kiba buh da ka sorkar.
Ka JNC kala pynpaw ba wat ki jaka pule bad ki samla pule, kiba juh ïashim bynta ha kiba bun ki kam thung jingthung na ka bynta ka jingpynsngewthuh ïa ka mariang bad ka jingmyntoi paidbah ma ki ruh ki shah ngat ha ka ne ka policies, hato kam dei ba ki shah pynduh mynsiem haba phai ha ka liang ka pisa tyngka da kaba shah siew.
Ka JNC kala pynksan shuh shuh ba kum ka thain kaba la shah ktah jur ha ka jingtih dewiong, ka jingtih mawshun, khamtam ha ki karkhana shna cement bad kiwei kiwei ki kam karkhana, ki dei keiñ ban kit ia ki jinglut bad shah siew na ka bynta ki jingdonkam jong ki kiba iadei bad ka kam pynbha mariang, nalor ban pyndep ia ki jingkitkhlieh ba kyrpang jong ki katkum ka ain.
Ka sorkar kam dei ban buh ia ka jingkit jong ka jingpynbha ia ka mariang halor ki nongshong shnong katba kam pat lah ban pyniapher ia ka jingiashim bynta jong ki paidbah na ka jingkitkhlieh ia ka mariang ha ka kam khaii.
Ka Council kala buh jingkylli ruh balei ba hap ban pynbha lane ban ai ia kita ki symbai dieng tang ha ki khlaw sorkar, dei ban buh hakhmat eh ïa ki jaka ba shah ktah na ka jingtih mawshun Jong ki company kum ha East Jaiñtia Hills, ha kaba donkam kyrkieh ban pynneh pynsah ïa ki jaka ba la jot, ban ïada ïa ki tyllong um, ban pynbha ïa ka lyer bad ban tei pat ïa ki jingtap ba jyrngam.
Ka JNC kala maham ba kum kine ki polisi ki don ka jingma ban pynduh mynsiem ia ki briew kiba kloi ban shim ia ka kam pynroi khlaw ha la ki jong ki jaka bad ki jaka shong shnong. Ha ka jaka ban buh ha khmat eh ia ki Paidbah ba ka sorkar ka dei ban pynshlur, pynsuk bad kyrshan ia ki nongshong shnong, ki samla pule, ki jaka pule ban iashim bynta shitrhem ha kaba iada bad pynbha pat ia ka mariang, ka buh pat da ka dor.
“Ka Sorkar ka dei ban pynshlur ia ki briew ban thung dieng, ym ban pynduh mynsiem ia ki lyngba ki jingkhanglad ha ka liang ka pisa tyngka. Ia ki briew kiba kloi ban pynphai biang iala ka khyndew bad ban iada iala ka mariang dei ban kyrshan ym ban pynkit jingeh
Kumta ka Council kala dawa ban bishar biang ia ka hukum bad kala khot ruh ia ka sorkar ban pynduh noh shisyndon ia kane ka jingbuh por pynkut u Wanshwa Suting General Secretary ka JNC.



