Shillong, Naiwieng, 22: Ka tnad jong ka jingdro bad kolshor jong ka sorkar Meghalaya, lyngba ka museum, kaba la tip kum ka Williamson Sangma Meghalaya State Museum, kala ioh iashim bynta ha ka “Jal, Jangal, Jamin: A Gathering of Indigenous Voices,” kaba dei ruh ka jingpyni la ki sap ki phong bad ia kane, la pyniaid da ka Kolkata Centre for Creativity ha ka jingiatreilang bad ka Indian Museum bad ka TRIFED kaba long kum shi bynta jong ka AMI Arts Festival bad ka dei ruh ka jingrakhe iaka World Heritage Week.
La sdang pynlong ia kane ka jingpyni naduh ka 20 haduh ka 25/Naiwieng/2026 ha Indian Museum, Kolkata, kaba dei ka museum ba la rim tam ha ka Ri Asia baroh kawei, lem bad 25 tylli ki museum bad ki katto katne ki kynhun ne ki seng na kylleng ki Ri kiba la iashim bynta ha kane ka jingpyni.
Kane ka jingialang ka pyniasoh iaki ktien bad ki riti dustur riewlum bapher na ki bynta bapher bapher jong ka Ri India, da kaba ai ka lad iaki museum bad ki seng sain pyrthei ban pyni iaka jingkordor ka tynrai, ka jingtip tynrai bad ki rukom shna kam tynrai jong ki jaidbynriew riewlum.
Iaka bynta ba pyni iaka Meghalaya la plie da ka Purnima Chakraborty, Myntri Khynnah ka tnad Information and Cultural Affairs, Sorkar West Bengal bad u Dr. Sayan Bhattacharya, Director jong ka Indian Museum. Ka jingplie iaka bynta jong ka jylla Meghalaya kala pynpaw iaka jingdonkam jong ka jingwan iashim bynta jong ka Meghalaya ha kane ka jingialang bah jong ka ri bad kala ai ruh iaka kabu ksiar ban pyni pyrthei iaka riti ka dustur kaba riewspah bad bapher bapher jong ka jylla sha ki nongwan jngohkai pyrthei bad ki kynhun bapher bapher kiba la wan shimbynta.
Ha kane ka sngi ba kyrpang, la don lang ruh u Anupam Roy, u nongrwai bad u nongthoh sur jingrwai ba pawnam jong ka Ri India. Ka jingiadonlang jong u kala nang pynitynnad bad nang kyntiew shuh shuh iaka dor jong ka riti ka dustur bad ka jingkyrpang jong kane ka prokram.
Ki tiar tynrai bad ki mar riam tynrai jong ka Meghalaya la pynpaw ha ka jingpyni iaki mar ha ka Indian Museum ha Kolkata, hapoh ka jingialang ba la tip kum “Jal, Jangal, Jamin: A Gathering of Indigenous Voices”.
Ki jingpyni jong ka Meghalaya ki kynthup iaki tiar put tiar tem tynrai, ki khiew dkhiew, ki jain riam tynrai bad ki jingdeng, kiba don napdeng kita kiba la palat shispah snem ka rta.
Kine ki tiar ki pyni iaka jingnang jingstad, ka sap thaw mar, ki riti treikam bad ka jingim man ka sngi jong ki jaidbynriew riewlum jong ka Meghalaya kiba la iaid mynta la bun pateng. Ka jingpyni iaki ha ka Indian Museum ha Kolkata ka ai lad iaki nongwan peit na kylleng ka ri ban sngewthuh iaka riti dustur ka Meghalaya hapoh ka jingiatylli jong ka riti riewlum ka India baroh kawei.
Ka tnad jong ka Arts and Culture, ka sorkar Meghalaya, kaba la iatreilang bad ka The Northeast India AV Archive, St. Anthony’s College, Shillong kala long ka nongiashim bynta lang na ka jylla Meghalaya. Kane ka jingiatreilang ka pyniasoh iaa jingshemphang bad ka jingstad ha kaba pyniaid iaki iing pyni lane ki museum bad ka jingpyniasoh iaki jingthoh rim jong kine ki ar tylli ki shlem ha kaba pyni iaka riti dustur bad ka jinglong tynrai jong ka Meghalaya ha ka rukom kaba pyniasoh iaki tiar bad ki jingiathuh khana ka por mynshwa bad ka jingsngewthuh jong mynta shaphang ka riti dustur bad ka jinglong tynrai jong ki trai muluk
Kum shi bynta jong kane ka prokram jingpyni paidbah, ki nongtrei jong ka tnad jingdro bad ka riti dustur, sorkar Meghalaya, kila ai ruh ka jingiathuh khana kaba lyngkot ha kawei ka prokram ba kyrpang kaba pynpaw iaki jingpyrshang ban pynneh bad iada kiba dang iaid ha ka Williamson Sangma Meghalaya State Museum.
Kane ka jingiathuh khana kala ai ka jingpeit bad jingtip kaba khraw shaphang ki jingpyrshang jong ka museum ban sumar, ban pynneh bad ban iada iaki jingioh lum jong ka bad ka pynkynmaw ruh iaka jingdonkam ban iada iaka spah bad ka riti dustur jong ka Meghalaya na bynta ki pateng lajong.
Ki prokram bapher bapher ha kane ka jingialang ki kynthup ruh iaka workshop shaphang ka jingpynneh iaka spah na u dieng, ka workshop shaphang ka kam pynneh iaki jain, ki jingiakren bad ki jingialehkai ki khynnah lane ki jingialehkai ba pyniaid da ki briew kiba ioh iaka jingstad ban shna iaki.






