Shillong, Lber 10:Ka Shillong Lajong FC ka la hab ban iasam noh mar shi point bad ka Pune FC hadien ba kine ki kynhun ki la iakhaid da 2-2 kol ha ka sngi Saitjain ha Balewadi Stadium, Pune.
Ha kane ka jingiakhun u rangialehikai na Brazil u Ulliams Souza Silva u dei u namtam jong Lajong ha kaba u la ioh ban thep ia ki artylli ki kol ban pyniakhaid ia ka jingiakhun katba na ka Pune la thep da u Gabriel Fernandes bad u Mirjan Pavlovic.
Kan long ka jingduh kaba khraw ia ka Lajong haba u Cornel Glenn rangialehkai world cup na Trinidad & Tobago ula hap ban wan phai noh hadien ba u la mynsaw bad ha ka jaka jong u la mih bujli noh pat da u Subhash Singh rangialeh kai barim ka Pune FC.
Ha ka jingialehkai ka Lajong kaba la kmhih lynti ban khur ia ka nam jop pynban ka la shah thep ha ka minit kaba 14 da u Gabriel Fernandes. ki rangialehkai ka Lajong kim shym la duh mynsiem bad ki la bteng ban ialehkai bha ban ioh pynphai kylla. Dei ka minit kaba 20 ka la pynphai ia katei ka kol lyngba u Ulliams Souza ban iakhaid da 1-1 ha ka kylla step.
Ha ka kylla miet ka jingialehkai ka la nangkhluit bad itynnad ha kaba ki kynhun ki la iakhun tyngeh ban ioh pynkhih jar bad hadien ka jingiai pyrshang kaba la bun sien bun wat bun ka Lajong ka la ioh ban thep biang ia ka kol baar da u Ulliams Souza ha ka minit kaba 70.
Ka Lajong kaba la sngewskhem ban ioh khur ia ki lai point hynrei ka kol kaba la wan lyngba u Mirjan Pavlovic na ka Pune ha ka minit kaba khadduh ka la khanglad sbak ia ka Lajong ban poi sha ka thong jongjop.
Kane ka kynhun ka la hiar sha ka kyrdan ba hynriew da 25 point hadien ka Dempo kaba la jop da 4-0 ia ka Sporting Clubede Goa.
Ka jingiakhun ban wan ia ka Lajong kan long pyrshah ia ka Kingfisher East Bengal na Kolkatta ha ka 14 tarik mynta u bnai.(SP News)
