Sohra, Kyllalyngkot 21: U bah John Kharshiing kum u nongialam ban pynim biang ia ka riti ka dustur bad ka jinglong tynrai kum ka jaid bynriew khasi u la leit kylleng ki hima ban pynshai paidbah ha kaba ia dei bad kane ka kam ha kaba ka dorbar ri kan sa long ha ka 13 tarik u Rymphang mynta u snem.
Ka Dorbar ki Nongsynshar Shnong, haduh Hima/Elaka jong ka thain Sohra ka la long ha ka 19 tarik 2013 por 11 baje mynstep, ban ia kren halor ka jingpynkhreh ia ka Dorbar R
i kaba Kyrpang kaban long ha ka 13 tarik February 2013 ha Mairang, ha khmat Iing office Syiem Hima Nongkhlaw.
Ia katei ka Dorbar ha Sohra la pyniaid da u Paiem Freeman Syiem, Syiem Hima Sohra, ha ka jingiadon lang ki Myntri, Lyngdoh, Sirdar, Secy Hima, ki Rangbah Shnong, ki Sordar bad ki Riew Rangbah na katei ka thain, ha ka jingiadon lang u Bah John F Kharshiing, Co-Chairman, MIDC, Govt of Meghalaya, Chairman, Grand Council of Chiefs of Meghalaya, & bad u Paiem Nangtei Syiemiong, Syiem Hima Langrin,
Hadien ba la ioh ia ki jingpynshai katei ka Dorbar ha Sohra ka la pdiang sngewbha ban shim khia ban pynkhreh ba iawer ia ki Dorbar Kur, ki Dorbar Shnong, Ki Dorbar Hima bad ki Seng Bhalang bad ki paidbah, rangbah, longkmie, samla kynthei bad shynrang sha katei ka Dorbar Ri kaba Kyrpang ha ka 13 February 2013, ba la khot hapoh Hima Nongkhlaw ba kan long kaba rah ia ka burom bad ka nam jong ka jaidbyriew baroh kawei.
Na ka liang u Bah John F Kharshiing, Chairman, Grand Council of Chiefs of Meghalaya, & Spokesperson, Federation of Khasi States, ha kaba kren hakhmat kane ki Rangbah Shnong, ki Sirdar bad Lyngdoh, Hima u la pynpaw ia ka jingsngewnguh ia U Paiem Phrester Manik Syiemlieh, bad ka Dorbar Syiem Hima Nongkhlaw kiba la pdiang ban lum bad ban khot ia ka Dorbar Ri kaba kyrpang bad kaba saw. U Bah John F Kharshiing, u la ong ba ka long kaba donkam bha kum ha kane ka por ban lum ia ka Dorbar Ri ban bteng ia ki rai jong ka Dorbar Ri kaba nongkong 14 Jan 2004, kaba ar 6 October 2007 bad kaba lai 14 November 2011.
Ha kawei ka liang u la ong ba Ki Nongsynshar Shnong, Raid bad Hima kumba long mynta ki long tang ki nongpeit na sha jngai ia ka Sain Pyrthei jong ka Ri India, kumta la donkam ban pynsngew ia baroh ki jingdonkam lyngba ka Dorbar Ri kaba khlem ka jingialong liang, bad kaba khlem jingsngewpher ha ka niam, ka Dorbar Ri ka long jong baroh bad ki don hok ban ia shim bynta ha katei ka Dorbar.
U la ong ba ka long kaba donkam ban pynsngew hakhmat ka Dorbar Ri kaba Kyrpang bad kaba Saw( Special Peoples Parliament) bad ki khun ki hajar ia u soh bad ka jingjop jong ka jinglum Dorbar Ri lai sien ba ka long ka sien nyngkong hadien 64 snem ba ka bor Constitution Ri India katkum Article 338 ka National Commission for Schedule Tribes(NCST) ka la ai ia ka rai bishar ha ka 26 April 2012, kaba pynkysan ia ki dulir Instrument of Accession and Annexed Agreement 17 August 1948, bad ka la bthah (direct) ia ka tnad Union Ministry for Tribal Affairs, Sorkar India ban leh ia kaba donkam ban pyndep ia kitei ki jingkular kiba la mynjur da ka Sorkar India bad ki Hima Khasi States.
Nalor katei la don ruh ki kam kiba la nang mih kiba long kiba pynksan ia ki jingialeh bad ka jingdawa jong ka Dorbar Ri. Sashisien kum ka jaidbynriew riewlum kaba kyrpang ngi ioh ia ka lad ban rah ia ki hok jong ngi hakhmat ka Ri India.
Halor katei ka rai bishar jong ka office NCST ngi sngewdei ban pynsngew sha ki seng sain pyrthei (political party) ban shim khia halor kine ki ei ei bad ban pynsngew ia kane ka kam sha Delhi. Bad dei halor kane ka phang ba ka Dorbar Ki Khlieh Nongsynshar ka la khot sngewbha ia ki President jong baroh ki seng National bad State poltical parties kiba don hapoh ka jylla ban pynsngew ia ka nongrim jong ki ha kaba iadei bad ki hok jong ka jaidbynriew.
Na ka liang ka Dorbar u la pyntip ba ki la phah ia ka shithi khot sngewbha ia u Hon’ble Shri. Pranab Mukerjee, President Ri India, u Shri V K Chandra Deo, Myntri ka tnad Tribal Affairs, bad kiwei kiwei ban wan sha ka Dorbar Ri. U la ong ba ka jingpynkhreh na kiwei ki Hima ka la nang iaid shakhmat ha kaba la khmih lynti ba ka Dorbar Ri kaba kyrpang bad kaba Saw kan long kaba seisoh.
Ha ka Dorbar u Bah John F Kharshiing, Chairman, Ka Dorbar Ki Khlieh Nongsynshar Ka Ri Hynniewtrep, u la pyntip ba ka Dorbar ka la pynkhreh ia ki jingialang bapher bapher kum ka jingpynkhreh ia ka Dorbar Ri bad u la ong ba ka Dorbar ki Sordar kynthup ki Rangbah, Samla naduh Shnong, Raid jong ka Hima Nongkhlaw kin ia kynduh por 10 baje 21 tarik January 2013, ha Mairang, Office Syiem Nongkhlaw; katba ki Sordar bad ki Rangbah, ki Hima Nongstoin, Rambrai, Nobosohphoh, Maharam, Mariaw, Mawiang, Jyrngam, Nonglang, Riangsih, bad kiwei kan long por 11 baje mynstep 22 tarik January 2013 ha Office Syiem Nongstoin, ki ba marjan kin ia kynduh 24 tarik January,2013 hapoh Iing Dorbar Saiden, Hima Nongpoh, Khadphra(18) Elaka Dolloi bad Sirdar sha Ri Lum Jaintia Hills kin ia kynduh lang ha ka por 11 baje mynstep ha ka 25 tarik January 2013, ha Hall Tpep Pale Locality, Jowai, bad ki Nongsynshar ka thain Mawsynram ha ka por 11 baje 28 tarik Jan 2013, ki Nongsynshar baroh naduh Shnong, Raid ka Hima Khyrim kin ia kynduh por 11 baje mynstep ha 30 tarik ha Smit, Hima Khyrim bad ki Nongsynshar, ki Rangbah, Samla naduh Shnong, haduh Raid Hima Mylliem, por 12 baje nongsngi 31 tarik January 2013, ha Mawkhar, Office Iing Dorbar Syiem Hima Mylliem, kumta la kyrpad jur ia bador ban shim khia ban por ban ioh ka jingpynshai ha kaba iadei bad ka jingdonkam ban poi ryntih lang baroh sha ka Dorbar Ri ha Mairang ha ka 13 February 2013 naduh por 10 baje mynstep.
Ha katei ka Dorbar ha Iing Dorbar Hima Sohra, la poi ki long na ka thain Sohra, Mawbeh Lakhar, Nongkroh, Tynrong, Shella, Sohbar, Mawlong, Saitsohpen, Laitkyngkot, Sohrarim, kynthup ki nongkitkam samla Nongkitkam KSU South Khasi Hills, bad kiwei.
Kiba la ia don lang ha katei ka jingialang bad kiba la ai jingkren ki long u Paiem Freeman Syiem Syiem Hima Sohra, Paiem Nangtei Syiemiong, Acting Syiem Hima Langrin, Sirdar Hima Tyngrong, Sirdar Hima Nongkhroh, Sirdar Ramdait, Chairman, Dorbar Hima Sohbar, bad bun ngut ki Rangbah Shnong bad ki dkhot Committee Shnong jong ki shnong bapher bapher.(SP News)
