Shillong, Nailar 14: Ban kynmaw ia ka jingdap shisnem jong ka jingkhlad ka Crystal Gayle Kharnaior ka Riti Academy kan ai khusnam kyrpang ia ki duhalia kiba don ia ka sap ka phong ha ka tem kapud tynrai kane ka long kum ban sah kynmaw ïa ka lyngkhuh snem ba nyngkong kaba la khlad noh shi snem mynshwa ha ka jingjia a sngewsih ha ka 12tarik Nailur, 2017 ha surok bah ba hajan paki dulan jong u Lat ka jylla, ka Riti Academy ka la seng ïa ka khusnam ban ithuh bad pyrto ïa ki samla ba tbit tam ha ka thohdur, ka sawangka, ka durim bad ha ka rwai ka siaw ka put ka tem.
Ha ka jingrakhe ka ba synlar ka ba la long ha shlem treikam jong ka Riti Aacdemy, u wei na ki khlieh sorkar jylla, U K N Kumar, Additional Chief Secretary, u ba long u kongsan u la kynmaw tympang ïa ka jingjia ha kaba u la leit hi da lade ban thaw lad ban pyllait im ïa kito ki ba hap ha kata ka apot, haduh ba ym lah shuh ban leh ei ei namar ba lah jubor than ka jingkhia jong u dieng u ba lah khyllem.
U la kren pangnud bad myllung ïa baroh ki mynsiem briew ki ba lah khlad ha kata ka sngi khamtam ïa ka Crystal Gayle iba u la kham shim khia na ka daw ba ki la lap ba ka dang ksaid bad sah mynsiem.Kiwei pat ki kynrem ba la ïa don lang ki long u Lyngdoh Sad, Most Rev Dominic Jala, Archbishop jong ka Shillong Arch-diocese, I Bah P S Dkhar, Deputy Commissioner, East Khasi Hills bad u Dominic Sangma, u barikor shna durim.
Baroh ki kynrem ki lyndan ki la ïaroh ïa ka jingpyrshang jong ka Riti Academy bad ka khusnam ka long kawei na ki lad ban ai mynsiem bad pynshlur shuh shuh ïa ki samla. Ka khusnam ba nyngkong ha ka kyrteng jong ka Crystal Gayle la ainam ha u barikor ba tbit, u Skhemlang Hynñiewta bad la sam da u K N Kumar bad Lyngdohsad Dominic Jala. Ha kajuh ka por la pynkup burom ruh ïa ki samla ba la shim bynta ha ki jinglehkai sawangka ba la pyniaid da ka Riti Academy.
Shwa ïa kane U Lyngdoh Sad Dominic Jala u la kyrkhu ïa u durmot jong u Sohblei Sylvanus Sngi Lyngdoh ba la shna da u barikor Skhemlang Hynñiewta ha ka ba la lamkhmat bad pynïaid da ka Riti Academy. U Sohblei Sngi Lyngdoh u long u riewniam uba tbit tam ha ki kam ban kyntiew ïa ka stadblei, ka lariti bad ka thohkot thohsla Khasi ha ka ba la pyrto kyrpang da ka Riti Academy bad ki para dkhot jong ka seng.
