Shillong, Jymmang 03: Ka jingialang jong ka United Democratic Alliance (UDA) ka kynhun synshar ha KHADC kam shym la lah ban ia poi sha ka jingiasngewthuh jingmut haba la hap ban buh teng bad ba kin dang ia kynduh biang ha kane ka taiew ban wan.
Ki tyllong khubor kiba ia jan bad ka UDP ki iathuh ba, na ka liang jong ka UDP ka dang kwah eh ban ia trei lang kum ba ka long hapoh ka sorkar jylla, ka NPP, UDP, PDF, HSPDP bad ki dkhot shimet ba kane ka juh ka rukom kan long lang kumba ka long ha KHADC bad JHADC.
Halor kane ka jingleh philian ki katto katne ki MDC jong ka NPP ban pynkhih ia ka shuki CEM hapoh hong ka KHADC na ka liang jong ka party UDP ka dang peitkai ia kane ka jingleh jong ki katto katne ngut ki MDC na ka NPP bad ka dang ap ba ia kane ka jingleh dei ban lah ban ia pynbeit ia ka jingialang jong UDA.
Ka jingiatreilang hapoh ka UDA ka dei ban don da ka jingiasngewthuh jingmutlang bad haba ki shim ia kino kino ki rai dei ban ia sngewthuh lang namar kane ka EC kaba la ialam da ka UDP ha KHADC da u bah Teinwell Dkhar ka dang iaid mynta kumba ar bnai ei ei hynrei kila mih kine ki kynrum kynram.
Ki lad khubor ki iathuh ba ka UDP mynta ka dang peit kai ia kane ka jingpynkhih ia ka shuki CEM hapoh jong ka KHADC, namar kumba ka long mynta ka jingbym don ia ka ain kyntiap seng hapoh District Council kala pynlong ia ki MDC ba kin ia leh katba ki mon ha dien ba kila jop ia ka ilekshon MDC.
