Wapungskur, Jylliew 06: Ka Moopynieiñ Socio, Cultural & Sports Organisation (MSCSO), Wapung
skur, East Jaintia Hills District, hapoh ka jingialam jong u bah Shaniahskhem Dkhar, President bad u ma Reachingson Siangshai, nongaibuit ka seng bad kiwei kiwei ki nongialam jong ka seng bad ki nongialam dong ki la iakynduh ia u myntri ka kam Sports bad Youth Affair jong ka Sorkar jylla.
Ka seng MSCSO kila ia kynduh ruh ia u ma Kyrmen Shylla, local MLA bad myntri ka Revenue & Disaster Management Department myn ha ka sngi nyngkong ban dawa na ki lyngba ka memorandum ban pynbiang bad pynbha ia ka madan ialehkai bad kiwei kiwei ki bynta ka madan jong ka Dong Moopyniein.
“Ka jingbym don ia ka madan ialehkai kaba biang hapoh ka Dong jong ngi, ka la khang lad ia ki khun samla kiba don sap ha ki kam games & sports ban pynkhreh ha kaban iashim bynta ha ki block-level ne district-level ne state-level sports competitions ne athletic meet, bad ruh ban pynlong ia ki khun samla ban ngop ha kiba bun ki bynta kiba sniew bad pynjot ia ka jingim jong ki khamtam da kaba ngop ha ka jingdih pynbuaid kiba bun jait”, ong u bah Shaniahskhem Dkhar.
“Kum ka seng kaba peit ia ka bha ka miat bad ban kyntiew ia ki khun samla jong ka dong bad ka shnong Wapungskur hi baroh kawei ha kaba bun ki bynta, ngi la shem ba ka Sorkar jylla hi bunsien ka kyntait ban pynbiang madan ialehkai ne wat ia ki indoor stadiums, ki Youth Centre, ki library, ki auditorium, ki Recreational centre bad kiwei kiwei ki jingdonkam ha man la ki shnong, bad kane kan wanrah ia ka jingkhang lad ia ki khun samla ban kilan met da kaba biang khnang ban iashim bynta ha ki jingiakop bapher bapher.
La ong ba ha jaka ba ki khun samla hadien ba wan skul bad ruh ia kito ki samla kiba bym don lad ki kmie ki kpa ban pynleit skul ne wat ki khun samla kiba don sap ha ki kam ialehkai, kin pynbunkam ha ki bynta kiba tei ia ka jingmut jingpyrkhat bad ka met jong ki, da kaba don kitei ki jingdonkam kumba la ong, pynban ki la ngop ha ki kam dih kyiad, dih drugs, ne dih kino kino ki jait pynbuaid bad ban ngop ruh ha ki kam sniew kiba bun jait kiba ktah ia ka shongsuk shongsain bad ka bha ka miat jong ka imlang sahlang hapoh ka shnong.” pynpaw sa u bah Reachingson Siangshai.
Kumta ka seng ka la dawa ruh na ka sorkar jylla lyngba ka Sports bad Youth Affair Department ban wad lad ban pynbiang ia ki jingdonkam jong ki khun samla kiba dei ki lawei jong ka Jaidbynriew ha shwa ba kiba bun ki samla kin ngop ha ki kam sniew ka ban pynjot ia ka lawei jong ki bad ka lawei jong ka jylla hi baroh kawei.
“Shaei ki khun samla kin poi khamtam ia kito kiba duk bad kiba donsap lada ka sorkar kam pynbiang ia ka madan ialehkai bad kiwei kiwei ki jingdonkam jong ki? Mano ban bahkhlieh ia ka jingngop ki khun samla ha ki kam sniew? Hato kam dei ka kamram jong ka Sorkar? Ngi kyrmen ba kane ka sorkar kaba mynta kan buhthong ha kaban peit bad pynbiang ia ki jingdonkam jong ki khun samla na ka bynta ka jingmyntoi jong ka jylla hi baroh kawei.”, ong sa u bah Julyewanmi Siangshai, general secretary ka Seng.
Ha ka jingiakynduh bad hadien ba la ai ia ka memorandum sha u bah Banteidor Lyngdoh, myntri ka Sports bad Youth Affairs bad sha u ma Kyrmen Shylla, uba dei ruh u local MLA bad myntri ka Revenue & Disaster Management jong ka sorkar Jylla, ki nongialam jong ka MSCSO ki la pynpaw ia ka jingsngewnguh ia kitei ki ar ngut ki myntri hadien ba ki la kular ia ki dkhot ka seng ban shimkhia ia katei ka kam bad ban pynbiang ia ki jingdonkam jong ka ha kaba iadei bad katei ka jingdawa khnang ban lait ki khun samla jong ka Dong bad ka Shnong Wapungskur hi baroh kawei na ki kam sniew kiba ktah ia ka imlang sahlang hapoh ka shnong Wapungskur, pynkut ka kyrwoh na ka seng.
