Shillong, Jymmang 19: U Director jong ka Sikkim Manipal University (SMU) Shillong u Gagan Jain u la ong ba ia kane ka jaka pule la pyniasoh bad ka SMU kaba don ha ka jylla Sikkim, Gantok ha kaba ka University Grant Commission jong ka Ri India ka la ai ia ka jingithuh ia ka.
Ki samla pule kiba don ha kane ka jaka kim dei ban don jingartatien ei ei ruh em. La ong ba kane ka jaka pule kaba don ha Shillong kam lah ban ai certificate ia ki samla kiba pass na kane ka jaka pule hynrei ia ki la ai da ka SMU Gantok.
Kane ka jaka pule ka long kum kiwei ki college kiba don ha kane ka nongbah Shillong kiba la pyniasoh ia lade bad ka NEHU, kane ka SMU Shillong ruh ka la pyniasoh ia lade bad ka SMU kaba na Sikkim ha kaba u Lat jong ka jylla Sikkim u long u Cahnsellor.
La ong ruh ba bun na ki samla kiba la pass na kane ka jaka ki la ioh haki kam sorkar bad kiba dang kwah ban pule ki la leit sha NEHU, kane ka kren shai ba ia ki certificate kiba la ai da ka SMU la iathuh da ki bor sorkar katkum ki kyndon ain.(SP News)
