Shillong, Kyllalyngkot 31: U lamphang jong ka Confederation of Meghalaya Social Organisation (COMSO) u Bah Roberjune Kharjahrin u la ong ba kin sdang biang ia ka jingiakhih ban dawa ia ka Inner Line permit hapoh jong ka jylla Meghalaya da kaba shong kyllain mungor.
Haba kren ha ki lat pathai khubor u la ong ba kane ka jingiakhih shong kyllain mungor kan long san sngi lynter, kaba kin sdang naduh ka 4 tarik bad kin pynkut ha ka 8 tarik jong u bani Rymphang ha kane ka nongbah Shillong.
Lada ka sorkar pdeng kam sngap ia kane ka jingiakhih kaba jai jai na ka liang jong ka seng kan dang pynjur shuh ia ki jingiakhih ban dawa ba dei ban pyntrei kam noh ia ka ILP ha kane ka jylla Meghalaya.
U Bah Kharjahrin u la ong ba la iohi ia ka jingiakynduh u myntri rangbah ka jylla u Conrad K Sangma ia u myntri kam poh iing ka sorkar pdeng u Amit Shah hynrei kane ka jingiakynduh kam shym don kano kano ka dak kaba ka sorkar pdeng kan pyntrei kam ia ka ILP ha kane ka jylla Meghalaya.
U tei u nongialam ka COMSO, u la kyntu ia ki paidbah ba kane ka jingdawa ia ka ILP kam dei ban long tang jong ki seng bhalang lane jong ki MLA, hynrei ka dei ban long jong ki paidbah ki ki long tang ki nongialam hynrei ka jingiakhih ka dei ban long jong ki paidbah.
Haba phai sha ki MLA, u nongialam jong ka COMSO, u la ong ba ki dei ban hun tang ba ki la pdiang ia ka rai hapoh iing dorbar ban dawa ia ka ILP hynrei ki dei ban leit lang baroh 60 ngut sha Delhi ban pynpaw ba ki ruh ki dawa ia ka ILP, hynrei kum ba ka long mynta kila shu ia sngap.
La ong ba ka sorkar pdeng kala kyntait saw sien ia ka jingdawa jong ka jylla Meghalaya ban khanglat ia ka jingwan rung ki briew kiba na bar, kaba nyngkong dei ha u snem 1973, kaba ar ha u snem 1986, kaba lai ha u snem 2006 bad kaba saw kumba ka paw mynta ia ka rai jong ka iing dorbar kaba la shim ha ka 19/12/2019 ban pyntrei kam ia ka ILP.
Haba jubab ia ki jingkylli haba ia dei bad ka mukotduma kaba don mynta hapoh Supreme Court halor ka ILP, u Bah Kharjahrin u la ong ba kane kan nym ia tyngkhuh bad kane ka jingdawa namar ka jingdawa ia ka ILP mynta kan long ha ka jylla baroh kawei.
