Shillong, Lber 09: U Myntri ka koit ka khiah jong ka jylla u bah AL Hek u la ong ba ha ka jingialang kaba la long mynta ka sngi u la bthah ia ki bor ba pyniaid ia ka hospital NEIGRIHMS ba dei ban wad ia kiba don kti ban pynphirang ia ka kyrteng jong u ba pang bad dei ban pynshitom ia kiba don kti.
Haba kren ha ki lad ptahi khubor u bah Hek u la ong ba ka long pyrshah ia ka ain ban thad ia ka kyrteng jong u nongpang la ka long ha kano kano ka rukom, la iathuh ba ha kane ka jingilang kaba la long mynta ka sngi la bthah ia ki bor jong ka Hospital ban wad bad ban pynshitom ia kiba pynsaphriang ia kum katei ka khubor.
Na ka liang jong ki heh ka tnad ka koit ka khiah kiba la don lang ha kane ka sngi, kila pynthikna ba haduh mynta kam pat don ba ioh ia kane ka jingpang Coranavirus, na ka liang jong ka tnad ka koit ka khiah kala jurip bniah ia ki briew kiba wan na sha bar Ri, kum ka China, Hongkong, Japan, South Korea, Singapore, Thailand ki ri kiba la shah ktah ha kane ka jingpang.
La aithuh ba ki briew kiba la wan na China ki long 44 ngut, Singapore 2, Thailand 12, Japan 3 bad Hongkong 1, kumba ka long mynta baroh ki briew kiba la wan rung hapoh ka jylla na kitei ki ri ki long barohki long 62 ngut baroh kine bala wan kim don kano kano ka dak jingpang.
Na ka liang jong ka sorkar kala buh ia ka jaka jurip ia ki briew kiba wan rung na sha bar ri, ha Umroi Airport jong ka Ri Bhoi District, Dawki ha West Jiantia Hills District bad ha Dalu jong ka South Garo Hills District kiba ia khap bad ka Bangladesh. Haba ia dei bad ka jaka rung ki briew hapoh Byrnihat ki dang ia kren.
Haba ia dei bad u ba pang ha NEIGRIHMS u dei tang ba u pang shit bad sukhriat, kam dei ka jingpang kumba ka kynnoh, ka jingpeit bniah ka long ba une u briew u juh wan juh leit sha Delhi, kumba ka long ki jaka jurip bniah ha ka Ri India ki don tang phra tylli bad na ka bynta ka Dong shatei lam mih ngi jong ka Ri India ka don tang ha Kolkatta.
Haba ia dei bad ki jain tap khmut, na ka liang jong ki Doktor kila ong ba kumba ka long mynta ka don ka jingduna, ym tang ha kane ka nongbah Shillong, hynrei ha Guwahati bad kum juh ha Delhi ruh, la ong ba ki briew ba shait ba khlain kim dei ban deng mass.
