Shillong, Nailur 24: Ban pynlait na ka jingsep ei ki soh ki pai jong kane ka jylla bad ban iarap ia ki nongrep kiba rep ia ki jaitsoh kiba ha rukom ban nym bret ei ia ki ia ki soh ka Kabinet mynta ka sngi ha ka jingialang ka shim ia rai ba ka sorkar kan ithuh noh ia ka jingshna wine na ki soh bad ban pyniaid iew ia ki.
U Myntri Rangbah ka jylla U Conrad K Sangma u la ong ba ka jingshim ia kane ka rai ka long ban pynlait ia ki nongrep na ka jingbret ei ia ki soh kiba bun jaid kiba ka jylla ka pynmih, ha ka juh ka por kan long ruh ka lat ai kam ai jam ia ki briew ha kylleng jong ka jylla, kane ka rai kan iarap ban kyntiew ia ka ioh ka kot jong ki nongrep.
Haba ia dei bad kane ka rai u myntri rangbah u la batai ba ka sorkar kala buh ia ka bai laisen ban shna Wine T.7500 tyngka bad ia kane hap ban pynthymmai man la u snem bad ka bai khajna na ka bynta shi synduk ka sorkar kan shim T.100 tyngka bad la pynlait ia kiba shna Wine na ka khajna kaba la tip kum ka Value Added Tax.
Haba ia dei bad ka khajna kaba la tip kum ka “Cess” ka Kabinet kala ai ia ka jingmynjur ban wan rah ia ka jingkylla ha ka Meghalaya Minerals Cess Act, ha kaba la pynrung shuh shuh ia ki marpoh khyndew sa khatsaw jait ki mar poh khyndew hapoh kane ka ain.
La iathuh ba ha kine ki snem kiba la leit la shim ia ka Cess tang na u Mawshun, Dewiong bad u Mawlein, hynrei mynta la pynrung sa khat saw tylli ki marpoh khyndew ha kane ka jingshim khana kaba la tip kum ka Cess.
Da kaba pynrung thymmai ia kine ki 14 tylli ki marpoh khyndew kan iarap ia ka sorkar ha ka jingioh lum khajna, la ong ba ha u snem mang tyngka 2017-2018 ka jingioh na ka Cess ka long tang T.48 klur bad da ka jingpynrung thymmai ia ki 14 jait ki marpoh khyndew ka jingioh na ka Cess la antad ba ka jingioh ka sorkar kan long T.72 klur ha kane snem mang tyngka 2019-2020.
Kiwei ki rai ki long halor ka jingwan rah ia ka jingpynkylla ha kaba ia dei bad ka Meghalaya Settlement of Arrears 2020, ka jingpynkylla ha kaba ia dei bad ka stamp Duty, da kane ka jingpynkylla ia ka stamp duty ki briew kiba shim ram na ki bank kim don kam shuh ban siew ia ka stamp duty.
Kawei pat ka dei ka Meghalaya Court Fees stamp, ka jingwan rah ia kane ka jingkylla ka long ba la shah ia ki briew ba kin siew online ha kaba ia dei bad ki kam hapoh iing kashari.
