Shillong, Naiwieng 06: U Symbut Myntri Rangbah ka jylla u bah Prestone Tynsong ba dei peit ruh ia ka tnad PWD, mynta ka sngi u la ong ba ka ophis jong u Executive Engineer jong ka Jowai North Division ka peit tang ia ki ar tylli ki konstitwensi, ka Mookaiaw bad ia ka Raliang-Shangpung Konstitwensi.
Haba kren ha ki lat pathai khubor u bah Prestone u la ong ba la rah ia kane ka ophis sha Shangpung namar ha katei ka jaka kala don ka ophis jong u SDO PWD, bad ia ka jaka ba don ka PWD North Division Jowai yn shna noh ia ka Mini Secretariat ha kaba baroh ki tnad sorkar kin don lut ha kane ka ophis.
La ong ba ka sorkar kala rai ban shna ia ki Mini secretariat ha baroh 11 tylli ki District kiba don ha ka jylla, hynrei ka sorkar kan sdang shuwa na ki ar tylli ki District kiba la rim tam ha ka jylla, ka Jaintia Hills District, ia kaba mynta la tip kum ka West Jaintia Hills District bad ka Tura kaba dei na nongbah jong ka West Garo Hills.
La ong ba ki paidbah ki tip ba ka ophis jong u Deputy Commissioner jong ka West Jaintia Hills ka don ha jan jong ka Iew Musiang, Jowai kaba la khapngiah bad ka sorkar ka kwah ban pynkylluid ia kane ka sor Jowai da kaba rah noh ia kane ka ophis sha katei ka jaka kaba thymmai.
La ong ba kan long ka burom ia ka Jaintia Hills baroh kawei ba ka Mini Secretariat kan don ha katei ka jaka haba baroh ki tnad sorkar kin don lut ha ka juh ka jaka ha kaba ki paidbah ki lah ban pyndep ia ki kam ki jam jong ki tang ha kawei ka jaka, ka sorkar ka leh ia kane na ka bynta ban rah ia ka jingtrei kam jong ka sorkar kham jan sha ki paidbah.
