Shillong, Nailar 07: U symbut myntri rangbah ka jylla u bah Prestone Tynsong ba dei peit ia ka tnad ka koit ka khiah mynta ka sngi u la ong ba ka jingpang COVID-19 positive ha kane ka kylla kaba ar ka dei ka “Delta Varian”.
Haba kren ha ka sien kaba nyngkong sha ki lat pathai khubor kum u myntri ba dei peit ia ka tnad ka koit ka khiah la ong ba ia kane la pynshisha da ki stad ba dei peit ia ka tnad ka koit ka khiah ba kane ka jingpang COVID-19 ha kane ka kylla kaba ar sien ka dei ka “Delta Variant”.
U myntri ka tnad ka koit ka khiah u la ong ba kane ka jingpang COVID-19 mynta ka kynti ka long ba ka lah ban pynbit haduh 6 ngut ki briew, kam dei shuh kum ba long ha ka sien wan kaba nyngkong kaba pynbit tang ar ngut ki briew, ban iada ia kane kam don lynti da kumwei lait noh tang ka jingai Tika.
Na ka liang jong ka sorkar kala shim ia ka rai ban bthah ia baroh ki Deputy Commissioner ba kin khot ia kren ia ki khlieh nongsynshar shnong naduh ki rangbah shnong, ki Nokma, bad na ka liang jong un sa khot ia ka jingiakren ia ki khleih nongsynshar shnong, kumba ka long mynta kane ka jingpang ha Meghalaya ka dang don palat ia ka 10% kiba test COVID-19 positive.
La iathuh ba kiba la dep ban ai Tika baroh haduh mynta ka sngi ha ka jylla baroh kawei ka dang long tang 45%, kiba dang sah ki long 55%. Na ka liang jong ka sorkar ka kyntu ia baroh ki paidbah ba kin shim ia kane ka jingai Tika ban iada na kane ka jingpang namar ym don lynti da kum wei pat.
Haba ia dei bad ka jingpyndep ia kiba khlad u myntri u la ong ba ka rai jong ka tnad ka koit ka khiah ka dang neh ka juh, hynrei kaba sngewsih ka long ba ki don ki shnong ba kim shah ban wanrah ia kiba iap ha ki shnong ki thaw, ka sorkar kala shah ia ki trai iing ba kin buh shimiet hynrei kim dei ban pynrung hapoh iing dei ban buh ha phyllaw.
