Nongstoin, Risaw 16: Lyngba ka jingshon katto katne ki dak ha ka keyboard, ka skul secondary ha Mawkynsah mynta ka lah ban ioh jingmyntoi na ki sienjam e-learning bapher bapher jong ka Sorkar India. Kane ka dei ka bor jong ka jingpyniasoh bad ka internet ha kaba ka wanrah ia ka jingjan ki briew bad ki lok kiba haiing bad ruh ia ki briew bad ki tyllong jingstad.
Kum shi bynta ka Azadi ka Amrit Mahotsav, ka tnat Telecom North-East LSA ka la plié ia ka jaka jong ka Bharatnet ha Mawkynsah kaba hap hapoh ka West Khasi Hills distrik. DDG (Rural) u Dilip Kumar bad u DDG (Security) u R K Maheshwari ki la iadon lang bad ki nongtrei ka BBNL kiba kynthup ruh ia u Shamad Mahajan ha kane ka sngi.
U headmaster ka skul, u Bah Brailian Lyngdoh u la ong ba u dap da ka jingsngew kmen ba kane ka internet ba stet kan long ka jingiarap ia ki khynnah skul. U Bah Lyngdoh bad u Secretary ka shnong, u Bah Pynshainlang Nongrang ruh ki la iashim bynta lang ha kane ka sngi ha ryngkat bad ki briew na ka shnong.
Lyngba ka jingplie ia ka jaka jong ka BharatNet ha Mawkynsah, sa kawei ka shnong ha Meghalaya mynta ka la kham jan bad kiwei kiwei ki bynta jong kane ka pyrthei. Ia kum kine ki jaka VSAT yn plié ha 599 tylli ki shnong kum shi bynta ka Ph-II jong ka projek BharatNet kaba dang iaid shakhmat mynta.
Ia mynta la dep ban dep sdang ia kum kine ki jaka ha 98 tylli ki shnong hapoh ka Ph-I. Ia ka jingpyniasoh bad kiwei kiwei ki shnong ba dang sah yn leh ha sa kawei ka bynta jong kane ka projek ka ban dang sdang.
Ka jingthmu jong kane ka projek ia kaba la pyntreikam ha kylleng ka ri ka dei ban ai ia ka internet kaba stet sha baroh 2.5 lak tylli ki Gram Panchayat ha ka ri. Shuh shuh, ka tnat Telecom ka dang bei tyngka na ka bynta ka jingpynieng ia ki tower mobile.
Kane ka long ban pynioh ia ka internet 4G ha 1164 tylli ki shnong ha Meghalaya ki bym pat ioh ia kane haduh mynta. Yn pynieng kumba 878 tylli ki tower mobile na ka bynta kane bad 11 tylli ki tower kin dei kiba don harud ki surok bah kiba iaid lyngba ka jylla.
Ki kshiad ba rymphum, ki madan kiba jyrngam, ki lum kiba sop lyoh, kine ki dei katto katne ki dak jong ka jingiadei jong ka Meghalaya bad ka Mariang. Bad kine ki sienjam na ka bynta ka jingpyniasoh lyngba ka telecom kin plié lad ban iathuh ia kane ka khana sha kylleng ka pyrthei.
