Shillong, Naiwieng 16: Mynta ka sngi u MLA jong ka Mawphlang u bah Eugeneson Lyngdoh la ong ban pynioh ia ki kam pynroi ha ki shnong ki thaw don kam ka jingiatrei lang ha pdeng ki bor shnong bad ki tnad sorkar.
Mynta ka sngi u bah Eugeneson u la ia kynduh ia ki rangbah shnong jong ki khatsaw tylli ki shnong kiba dei hapoh ka thain Sadew bad ha kane ka jingiakynduh kila ia mir jingmut halor ki kam kiba dei na ka bynta ki paidbah ka thain.
Na ka liang jong ki dorbar shnong kila pynpaw ba don kam ban don ia ki jingbuh dak ha katei ka surok bah kaba iaid lyngba kitei ki shnong ban iada na ka jingiaid sted ki kali namar kidon bun tylli ki skul ha shilynter ja katei ka surok bah Shillong Tura.
Kum kaba la kular ha ka por ilkeshon u bah Eugeneson u la ong ba u la bud dien ia kaei kaba u kpa jong u la leh bad kane ka long kawei na ki kam kiba la lah ban pynurlong namar ha kane ka sngi la buh mawnongrim ban shna ia ka lynti iaid kjat kaba saw kilo metter na Pomlum sha Sadew ha ka jinglut kaba T.4.91 klur tyngka.
Na ka liang jong u MLA u la ong ba ki shnong ki thaw ki dei ban ia treilang bad ki tnad sorkar bapher bapher ba ki kam kin nym thut bad kim dei ruh ban long ki nongpynthud ia ki kam pynroi.
Ha kane ka sngi ki rangbah shnong bad ki nongkit kam shnong na baroh khatsaw tylli kila ia poi sha kane ka jingiakynduh lang ha kaba u MLA u la wan hi da lade, ha ka jingiadon lang u Chief Engineer ka National High Way u Bruce P Marak, kiwei ki engineer kila ia don lang ban pynshai sha ki rangbah shnong halor katei ka lynti iaid kjat.
