Shillong, Naiwieng 30: U Deputy Inspector General ki shipai Border Security Force u D. Haokip la ong ba mynta kin don shuh kita ki ktem jaka rihtngen ki lehnoh na North East ha Bangladesh, hynrei ki lehnoh na kane ka thian ki dang don bad ki shah bad kiba ha iing ha sem.
Haba kren ha ki lat pathai khubor mynta ka sngi, la ong ba ka jingiarung ia mih ki lehnoh na kane ka jylla Meghalaya, Tripura, Assam sha Bangladesh ka dang don, hynrei kim don shuh kita ki ktem ki ban ai jinghikai ia ki lehnoh, ki lehnoh ka jylla Tripura ka NLFT ki don ha Chittagong, HNLC sha khap Khasi Hills bad ki dkhot ka ULFA sha khap Garo Hills.
U tei heh ki shipai BSF la ong ba ka jingkhaii masi sha Bangladesh kala sdang ban hiar ha dien ba ka jylla Assam kala wan rah ia ka ain iada ia ki masi, la ong ka jingiakhaii ka dang don hynrei kala hiar shibun ban ia kaba mynshuwa.
Haba phai sha ka jingker ksainar ha khappud bad ka Bangladesh la ong ba haduh mynta la dep ban ker haduh 70% kiba dangsah ki long 30% bad kine ki jaka kiba bun eh dei kiba khlem pat ker dei ha Khasi bad Jaintia Hills, ka daw jong ka jingslem dei ban khlem pat ioh jaka.
Halor ka jingkynnoh ba pynslem ki BSF ha ki kad khaii, u tei u heh shipai la ong ba ki BSF ki pyndep ia ka kam jong ki hynrei ban kynnoh ba dei na ka daw jong ki ba pynslem ka long ka bym shong nia, ia ka khaii pateng la plie na ka por 9.00 baje mynstep bad khang ha ka por 4.00 baje jan miet.
La iathuh ba na ka liang jong ki BSF kila pyrshang ban iarap ia ki briew jong kane ka jylla Meghalaya ban pynrung hapoh ka kynhun shipai BSF da kaba ai jinghikai ia ki samla ha ki nognkyndong, hynrei ka jingeh ka long ba ki samla kane ka jylla ki duna ka ryngieng, ka jingkhai bad ka koit ka khiah.
