Shillong, Nohprah 05: Ka seng jong ki nongot doh ka Khasi Jaintia Butcher’s Welfare Association (KJBWA) ka hap ban buria ka jinglut napla la jong ha kine ki saw snem na ka daw ka jingduna ki nongwan otdoh masi, sniang, katba ki blang naduh ba la plie ym pat don ban wan otdoh haduh mynta.
Haba kren bad u nongthoh khubor u Publicity secretary ka KJBWA Bah Kitbok Mylliem Umlong ula ong, na ka synjuk ka la iateh soskular bad ka sorkar jylla na bynta shiphew snem, hynrei haduh mynta ki hap ban pyniaid ha ka jingduhnong bad ki hap ban sei napla ia ki jinglut jingsep kum ka bai light ka baiwai bad kiwei ki jingdonkam.
U la ong ka bai light ba ki hap ban siew man u bnai ka long T.1.40,000 bad ka baiwai shibnai T.85 hajar, kumta kim lah ban pynmih ia katei ka pisa man u bnai namar kiba wan otdoh ki duna bha, khamtam ha kine ki ar snem ba la dep na ka jingjia ka khlam Covid bad ngi poi ha ka khim khait bad ngi hap sei pisa para dkhot na pla ban siew sha ka sorkar.
“Ha kaba sdang ngi iakhun bad kiwei ki kynhun na shabar jylla ban ioh pyniaid ia katei ka jaka otdoh namar ngi khmih lynti ban iohnong bad ngim poi pyrkhat ba kan jia ia kane ka apot ban hap sei pynban nap la lajong ban pyndap” u la bynrap.
U Bah Kitbok ula iathuh ka jingeh bym lah ban pynduna bai light ka long ba lada ki ot uwei u masi ne shibun ruh ki hap ban pyniaid kumjuh ia ki meshin otdoh, kumta ki shem jingeh halor ka bai light katba ka bai ot ka long tang T.300 haduh T.400 uwei u masi katba ki blang ym pat don uwei ruh ban wan otdoh naduh ba plie. U la bynrap ka rukom otdoh bad ban pyniap ia ki masi kam dei kumba ju leh da ki briew bad la pyntreikam baroh da ka bording ilektrik.
“Kawei pat kaba lutksan ka long lada phi phi otdoh uwei u masi ne shibun tylli ruh ki nongot doh ki dei ban don saw san ngut, namar uwei ot ia kawei ka bynta bad la pyniaid pat shawei ban ot sa uwei bad kumta ter ter bad shisien ba otdoh hap ban pyntreikam baroh ki meshin bad ki briew” u la bynrap.
U la ong ka doh ba ot ha Mawiong ka pher bad kiwei kiba ot ha iing da ki briew ha ka jingkhuid, namar ha katei ka jaka otdoh la pyntreikrem baroh da ki kor ki bor ilektrik ban lait na ki jaboh. Bad shwa ot ruh ki doctor ki da eksamin ioh ki don jingpang ban lait na ka jingma.
“Ka jingduna ki nongwan otdoh ka dei na ka daw ba ka sorkar kam shym pynmih kano kano ka jingmana bad kim bit shuh ban otdoh ha shnong ne ki jaka ba ju ot doh bad naduh ba plie haduh mynta bun kiba dangot doh ha kiwei ki jaka hapoh shnong. Na ka liang ka synjuk ka la iakren bad ka sorkar na ka por sha ka por halor kane bad kyrmen ha ki snem ban wan kan urlong bad kan treikam baroh katkum ka jingthmu ka sorkar jylla” la ong u bah Kitbok.
