Shillong, Nohprah 21: U Myntri ba dei peit ia ka tnad rep mynta ka sngi u la pynlait paidbah ia ka kot ha kaba ai dei bad ka kam ri Ngap ha kane ka jylla Meghalaya ha ka jingialang ha tnad rep ia kaba la tip kum ka “Apiculture -2”.
Haba kren ha kane ka jingialang plie paidbah u myntri u la ong ba kane ka kam ri ngap ha kane ka jylla Meghalaya kam dei kaba thymmai hynrei ka dei laba la don naduh hyndai, hynrei karei kaba don kam ka long ban pynheh ia kane ka kam katkum kane ka juk stad kaba mynta.
U Mytnri u la ong ba da peit bha ha ki jaka rep ba pyndon kam ia ki dawai sboh u ngap um juh don, hynrei u don ha ki jaka ba ka rep ka dei ka rep tynrai kum sha ri War, u myntri u la kyntu ruh ia kiba ri ngap ban pyntip sha ka tnad rep lada ki shem kano kano ka jigneh ym dei ban shu sngap.
Ha kane ka sngi la sam ruh ia ki ksing ri ngap sha ki nongrep jong kane ka District kiba hap hapoh jong ki lum khasi, kane ka jignsam mynta ka sngi ia ki ksing ri ngap ka long ka jignbteng ia ka “Apiculture -1” kaba la sdang ha u snem 2014.
Ha ka jingkren u mytnri u la ban jur ia ka rukom pyniaid iew ia ka ngap kaba mih na kane ka jylla Meghalaya, kaba sngewsih ka long ba ia ka ngap la thied tad na kane ka jylla bad ynda la song ba la wan die kylla sha kane ka jylla ha ka dor kaba rem.
U bah Banteidor u la ong ba ia kane ka kam ri ngap ha kane ka jylla Meghalaya la sdang ban pynshlur naduh ki snem 1976 da ka KVIC, hynrei na ka liang jong ka sorkar ka kwah ba kane ka rukom ri ngap kaba mynta kan long katkum kane ka juk stad da kaba pyndon pat ia ki tiar na kane ka jylla kum ki dien ban shan ia ki ksing ri ngap.
Ha ka jingkren u Dr. Vijay Kumar, Commissioner bad Secretary ka tnad rep jong ka sorkar Meghalaya la ong ba ha kane ka “Apiculture-2” ka long ba ka jingiarap ia ki nongri ngap ha kane ka jylla kan long T.70000/- tyngka, na kane T.35000/- tyngka kan dei ka jigniarap bad T.35000/- kan dei ka ram kaba khlem sut.
Ha kane ka sngi u bah S Mawlong Director jong ka MIE ruh u la ai jingkren ha kaba u la ong ba na ka liang jong ka sorkar kan pynioh ia ki lat jingiarap kumno ban pynbha ia ka rukom song ia ki marrep wat ia ka ngap ban ioh ban dei kham bha sha kiiew. Ha kane ka sngi la don lang ki nongri ngap na kylleng kane ka Ri Khasi ryngkat ki ophisar.
