Shillong, Nailur 24: Halor ka project kaba iadei bad kaban iada ia ka 
um bam umdih jong ka Sor Shillong kaba wan na ki thain Mawphlang ter ter, ia syllok u Bah John F Kharshiing, Co-Chairman, Meghalaya State Planning Board, Govt of Meghalaya, Chairman, Grand Council of Chiefs of Meghalaya, bad Spokesperson, Federation of Khasi States, bad u Mr Mark Poffenberger, Ph.D, Executive Director, Community Forestry International(USA), ha ryngkat ka jingiadon lang jong u Bah NK Lyngdoh, Lyngdoh, Hima Mawphlang, u Bah H L Ryntathiang, Lyngdoh Hima Lyngiong, u Bah Tambor Lyngdoh, Project Director, ka Synjuk ki 10 Hima, bad u Dr BK Tiwari, Professor, Center for Environmental Studies, NEHU, ha ka janmiet 13 tarik September 2013, hapoh Hotel Pinewood.
Katei ka project Forest and Biodiversity Conservation, Watershed Restoration & Livelihood Development jong ki shiphew Hima bad ki Elaka, kaba la pynwan dur da ka jingtrei shitom mynta la bun snem, da ki rangbah jong ka synjuk ki Hima Arliang Wah Umiam Mawphlang Welfare Society, kaba kynthup ia ki Rangbah, ki longkmie na kitei ki shiphew Hima /Elaka ha ryngkat ka jingkyrshan jong ka Community Forest International (CFI-USA) ki la lah mynta ban iasaid register bad ban pynrung ia ka project kum kawei na ka REDD + project.
Ia katei ka project la pdiang hadien ba la examin bad bishar bniah da ki riewstad scientist katkum ki kyndon jong ka Plan Vivo, UK, bad lyngba katei ka project yn sa lah ban die lyngba ka iew die carbon kum ka lad ban kyrshan ia ki jingthmu jong katei ka project ka thmu ban kyrshan ia ki paidbah ha kitei ki thain ban im bad ban kamai jah kpoh khlem da donkam ban pynjulor ia ki khlaw ki btap bad khamtam ban iada ia ka tyllong um jong ka Sor Shillong.
Katei ka project kum ka jingsdang ka kynthup ia shiphew tylli ki Hima/Elaka kynthup ia ki Hima Mawphlang, Hima Lyngiong, Hima Sohra, Hima Mylliem, Hima Nongspung, Hima Nongkhlaw, Hima Nonglwai, Hima Pamsanngut, Elaka Mawbeh bad Hima Laitkroh kiba sawdon bad marjan ka Wah Umiam Sub-Watershed, Hima Mawphlang.
Katei ka project kan kynthup ia kumba 62 tylli ki Shnong, bad ka jaka trei kam kan kynthup kumba 27,138 hectare, ha ki 10 Hima bad Elaka
Na ka liang u Bah John F Kharshiing, Co-Chairman, Meghalaya State Planning Board, Govt of Meghalaya, u la kyrmen ba katei ka project kaba dang long tang kum ka jingpyrshang (pilot project) lehse kan sa plie lad ia ngi ban sngewthuh haduh katno ka pyrthei baroh kawei ka don hapdeng ka jingkhih halor ka jing kylla ka na ka jingkiew ka jingkhluid ka lyer mariang, u la ong ba katei ka jingplie lynti ia ka kum katei ka project kan sa wanrah ka jingmyntoi ia ka jylla Meghalaya bad ka thain lam mihngi hi baroh kawei khamtam ha ki jylla ba don ki riti dustur bat khyndew kiba kyrpang. Katei ka project ka thew kumno ban ia trei lang bad ki paidbah ba kin sngew trai ia ka kam kum shibynta ban iada bad hikai ialade ba ngin long kiba peitngor ia ki sawdong sawkun kiba don ha ka jingma na ka jingrhah jong ki katto katne ngut kiba khlem pyrkhat shuh ia ki pateng kiban sa wan.(SP News)
