Shillong, Iaiong 26: Ka JAC Ri-bhoi ba kynthup ki lai tylli ki seng bhalang ka Meghalaya People United Front Ri-bhoi District, Ri-Bhoi Youth Organization bad Meghalaya People’s Social Organization mynta ka sngi ki la leit ban iakynduh ia u myntri ba dei peit ia ka ka tnad bording u A.T Mandal
Haba iakren bad ki lad pathai khubor u bah Jackson Sohtun. President ka Meghalaya People United Front Ri-bhoi District U la ong ba ka loadshading ha them Ri Bhoi ka long ka ba la palat, nalor ka loadshading ruh ka jinglip light ha them ribhoi ka long ka ba la jur shaba palat.
U la pynpaw ka jingsngewdiaw ha kaba kat ka nongpoh kaba dei ka headquarters ka District ka shah iehbeiñ ka hap mat ia ka jinglip light kaba khah khah, u la ong ruh ba ka don sa ka jinglip light man ka sngi.
Don teng teng ba shu ioh light tang hapdeng 3 ne 4 kynta ha ka shisngi, kane ka la ktah jur ia ki nongshongshong ka them ribhoi na ka liang ka JAC Ri-bhoi ka la kyntu jur ia ka bor ba dei peit ba nangne shakhmat kane kam dei shuh ban nang iai jia.
u Bah Jackson Sohtun u la iathuh ba na ka liang u A.T Mandal u la kubur ba un sa shimkhia ia kane bad un sa lum ia ka jingialang bad ki ophisar jong ka tnad sambor ding, kaei rai kaba mih ha ka jingialang yn sa phah ia ka jingtip ha kIMi nongialam ka JAC.
Shuh shuh na ka liang jong u bah Baiateilang Lapang u la iathuh ka jing pynlip light ka long kaba la palat namar la buh ha 7 baje haduh 8 baje janmiet bad ka light ka jah biang naduh 11 baje haduh 6 baje mynstep, ym tang katta hynrei ka light bunsien ka thud bha, wat ha ka por 8 ne 9 baje mynstep kam juh wan tista, hadien kata ka la poi biang sa ka por pynjah light naduh 9 baje haduh 12 baje shiteng sngi.
Kine ki nongialam jong ka JAC ki la ong ruh ba lada pynshong nongrim ia ka jing jah light ha ka thaiñ Ribhoi hi ka la long beit kumba 24 kynta, kumta ka JAC ka dap da ka jing sngewkhia bajur namar ba lada pyrkhat ia ki khynnah ba pule, ki kmie ki kpa ba pynbiang ka shet ka tiew ba pyndonkam da ka light.
Ka JAC ka la pynpaw ruh ba ka jingpynjah light ha ka por mynmiet ka wanrah pynban ia ki kam sniew kum ki kam tuh kam thiem bad kiwei pat. Ka JAC jong ki lai seng ka buh ia ka jingkyntu ia ka sorkar bad ia u myntri jong ka tnat bording na kin shimkhia bad ka seng hi kan ap ia ka jingkular jong u myntri haba iadei bad kane ka kam.
