Shillong, Jylliew 01: U President jong ka Voice of the People Party (VPP) bah Ardent M Basaiawmoit mynta ka sngi u la pynbna ba ula pynsangeh noh ia la jingshah jingit kaba ka iaid mynta 10 sngi, hadien ba ka sorkar Meghalaya la pynmih ia ka jingpynbna paidbah ba ka la thaw ia kawei ka Expert Committee ka ban bishar ia ka Reservation Policy.
U Bah Ardent u la kam ba kane ka dei ka mat ba ka VPP ka la buh ban dawa na ka Sorkar bad ia kane ka mat ka seng ka la buddien katba kiwei pat kim sngewnud ban leh eiei, u la pynpaw ka jingsngewnguh ia ki nongialam ka party kiba la leit mihkhmat sha ka Committee kiba la pynbor ia ka sorkar ban thaw ia kane Expert Commitee.
U bah Ardent Miller Basaiawmoit u la ong “Kumba nga la kular ia phi ki paidbah, nga la pyndep ia ka jingkular ba ngan ym mih na kane ka jaka katba ym pat mih ka notification da ka Sorkar”
Ula ong ba ka sorkar ka la kohnguh bad sngap ia ka jingdawa ba dei ban pynbeit thymmai ia ka Reservation Policy, hynrei ka VPP kan iai buddien ia ka jingthung kam thung jam da ka sorkar ba kam dei shuh ban iaid kynriang ha kaba tang ki briew kiba don jingithuh ne don jingiajan kin shah thungkam.
