Tura, Risaw ,3:Ka Myntri ki kam poh iing ka jylla ka kong Roshan Warjri kala ai jing kren haka jing ialang kaba la long ha Tura halor ka jingdawa ban pyntrei iak ILP ha ka jylla Meghalaya. Kala ong ka sorkar ka sngewkhia halor ka jingwan tuid jong ki briew kiba na bar hynrei kidon kiwei pat ki ain ban iada ynda da ILP.
Ka jylla Manipur kala dep pass ia ka ain ILP bad la phah sha ka sorkar pdeng hynrei haduh mynta ka sorkar pdeng ka dang sngap jar jar kam pat lah ei ei. Ka sorkar Meghalaya ka iohi ia kane bad kam kwah ban bynshed ia kane ka kam ban iada na ka jingwan jong ki briew ba na bar sha ka sorkar pdeng I akaei kaba ka sorkar jylla ka lah ban leh.
Ka jingdawa ban pyntreikam noh ia Inner Line Permit haka jylla kala wanrah iaka kynrum kynram haka jylla. Kane ka jingdawa kala pynklumar ia ka jylla baroh kawei, U myntri rangbah ka jylla ula hukum ia ka District Administration jong ka Tura bad Shillong ban iakynduh ia ki paidbah bad ki seng bhalang ban iakren halor kane ka jingdawa.
Ha katei ka jingialang paidbah na ka liang ki seng bhalang jong ka Ri Lum Garo ki la kyntait ban ia poi lang sha kane ka jingialang paidbah. Kiba la ia poi ki long ki riew paw khmat na katei ka thain ki riew rangbah bad ki long kmie. Ha kane ka jingialang la pynsngew ba don kam ia ki ain kiba khlain ban iada na ka jingwan tuid ki briew kiba na bar.
Na ka bynta kane, ka Tenancy Bill ba ka sorkar kan sa wanrah hapoh ka iing dorbar ka long ban pynbeit bad ban pyrkhing ia ki briew kiba wan na bar. Ha kane ka liang na ka liang jong ki nongkit kam shong kam thaw ki dei ban sngewthuh ban shim khia ia kane ka kam namar dei lyngba jong ki lah ban khanglad ia ka jingwanrung jong ki briew kiba na bar.
U DC jong ka West Garo Hills u Pravin Bakshi u la ong ba ka sorkar ka sngewkhia jur ia kane ka jingwan tuid jong ki briew kiba na bar bad dei na kane ka daw ba ka sorkar ka la wad ia ki lad ki lynti kumno ban khlanglad ia ki briew ban wanrung sha kane ka jylla, yn da ka ILP hynrei da kiwei ki lynti khlem da khanglad ia ka roi ka par ba kan kiew ha ki liang baroh.(SP News)
