Shillong, Nohprah 30: Mynta ka sngi ia ka jingleh burom ia ka lyngkhuh sngi iap ba 161 snem jong ukhlawait ka jaidbynriew Khasi-Pnar u Kiang Nangbah ka long kaba ishongkun, ha kaba la buh syntiew ia kid or mot jong u ha Shillong bad ha Syntu Ksiar ha Jowai.
Ha Syntu Ksiar la pynlang ia ki jingiakop kiba bun jaid ban rakhe ia kane ka sngi ha kaba ka MLA jong ka Sutnga ka kong Santa Mary Shylla kala wan ban sam ia ki khusnam kum ka kong san ha kane ka sngi.
Kiwei ki seng bhalang kum ka JSU, HANM seng kmie bala ialam da u President u bah Lamphrang Kharbani bad kiwei seng bad ki riew shimet kila buh ia u syntiew kum ka jingburom ia u tei u khla ka wait jong ka jaidbynriew Khasi-Pnar, ha ka sngi la ioh ruh ia ka jingbatai ha kaba ia dei bad u Kiang Nangbah.
Ha Shillong ki ar tylli ki seng bhalang jong ka jylla kata ka Khasi Students Union (KSU) bad ka Federation of Khasi Jaintia People (FKJGP) ki la pynpaw ïa ka jingpyrshah kaba jur halor ka jingkren u General Secretary jong ka UDP u Dr Jemino Mawthoh kaba u la pynpaw ba ka la donkam ban wanrah rel kit mar ha ka jylla namar kan dei ka jingmyntoi ïa ki paidbah nongshong shnong ka jylla.
Ïa kine ki jingkren u President ka KSU u samla Lambokstarwell Marngaru la pynpaw ha ka jingkynmaw burom ia ka lyngkhuh sngi khlad ba 161 u Khla wait ka jaidbynriew u Kiang Nangbah ha u motdur ba shi rynieng ba la tei sahnam ha syndah ka Civil Hospital Shillong
U Bah Lambokstarwell Marngar u la maham jur da kaba ong ba lada ka sorkar bad ka seng ka ba synshar ha ka jylla ka kwah palat ban wanrah ïa ka rel kit mar ka dei ban sngewthuh ba ka KSU ka pyrshah rai-maw rai-dieng ia kane.
U la ong ba ka sorkar ka dei ban sngewthuh ba ka ding kan klang beit halor kane bad ong ba kumba ha u 2017, 33 ngut ki shah kem na ka jingpyrshah ïa la lynti rel mynta ka kynti ruh kim salia lada shah kem da palat spah ngut ruh.
Na ka liang u Vice President ka FKJGP u Bah Kitboklang Nongphlang u la pynrem jur ïa ka nongrim ba ka UDP ka ïeng da kaba ong ba katba ki aiñ ki ban iada ia ka jaitbynriew, ka seng bad kiwei pat ki seng bhalang kin pyrshah jur ïa kane bad ong ba kita ki seng kiba kam ba dei ki seng riewlum ki ban Ïada ia ka jaidbynriew hynrei mynta ki kylla pynban ki seng len lum.
