Shillong, Risaw 25: Mynta ka sngi ka KSU jong ka South West Khasi Hills District kila leit ban ia kynduh ia u myntri ba dei peit ia ka tnad pule puthi jong ka jylla u bah Lahkmen Rymbui ha kane ka jingiakynduh la ai ia ka dorkhas ba ia dei bad ka jingdon kam ka South West Khasi Hills District.
Ha ka dorkhas kaba la ai ka KSU kala pynsngew ba ka Khasi Students’ Union South West Khasi Hills District , daka jingthrang ban kyntiew iaka pule puthi hapoh jongka dong ka thain bad da ka jingsngewkhia halor ki jingdkoh kiba don haba iadei bad kane ka bynta.
Ka KSU South West Khasi Hills District ka sngewdei ban pynpaw hakhmat jongphi ba watla ka South West Khasi Hills District ka la don mynta la kumba 10 snem eiei hynrei ka dang duna ha baroh ki liang khamtam haba iadei bad ka pule puthi.
Kiba bun ki samla kiba hap ban leh ne pule iaka Diploma in Elementary Education (D.El.Ed) ki hap ban iakhun ban ioh rung ha Nongstoin, West Khasi Hills District. Haba iadei bad kane ka bynta, kaba kum kane ka juh ka Institute ba la tip kum ka Block Institute of Education and Training Centre.
Haba ia dei bad kane ka phang la dep buh maw nongrim bad tei ha shnong Sakwang naduh u snem 2014-15 bad kaba sngewsih pat ka long ba kane ka la sahteng haduh mynta.
Kumta, kumba ia kane ka jingtei la dep pynieng Paia bad sdang haki snem ba mynshwa, ka seng namar kata ka sngewdei ba lada kata BIET Centre kam poi shuh shano shano la dei ba ka sorkar kan pynkylla noh shaka D.I.E.T Centre da kaba mang tyngka ban tei pyndep ha ka jaka kaba ka sorkar ka la dep shim naduh ki snem ba mynshwa.
Kaba kum kane ka Institute kan iarap iaki samla jongngi napoh ka District ban pyntbit kum ki nonghikai skul ba kin ioh iaki lad kiba biang bad ngi da kwah namar kata ba ka sorkar kan leheiei noh kham kloi halor kane ka bynta.
Ka Ophis jong u Director of Schools, Education and Literacy lyngba ka Letter No. DSEL/ABP/P/5/2020/270 Dated : Shillong , The 3rd November 2021 ka la mynjur iaki katto katne ki skul Government LPS ban kyntiew kyrdan noh shaki Government UPS. Napdeng kita ki skul, kine harum ki dei kiba la paw kyrteng.
Ki skul ki long ka, Rangthong Nongbah Govt. LPS. Nongummer Govt. LPS. Pyndenkseh Sepngi Govt. LPS. Mawranglang Govt. LPS. Rangblang Pombriew Govt. LPS. Phlangkynshi Govt. LPS bad ka Thangrai Govt. LPS.
Kumta, haba iadei bad kine ki skul haneng, ngi sngewdei ban kyrpad iaphi ba phin sngewbha ban pynkloi ha ka ban mang tyngka noh na bynta ki post Nonghikai bad kumjuh ruh ban phah jurip bad mang ban pynheh noh iaka ingskul jong kine ki skul.
Katba kum ka jingdawa jongka por bad na ka bynta ka jingsuk ki khynnah skul napoh ka thain Wahkaji, Umdohlun bad Phlangdiloin, na ka liang jongka KSU South West Khasi Hills District ka sngewdei ban pynkynmaw biang ia kane ka mat ba ngi la pynsngew teng hakhmat jongphi bad kata ka long ban thawlad thaw lynti naka liang jongka Sorkar ban wanrah noh daka SSLC Examination Centre hapoh kane ka thain khnang ba kan pynsuk iaki khynnah skul jong kane ka thain.
Kawei ka mat ba kum ka seng ngi kwah ban pynsngew shaka sorkar lyngba jongphi kum u Myntri ka sorkar Jylla ka long ba phin sngewbha ban phah jurip ia baroh ki skul kiba duna Nonghikai la ka long haki Government School, Deficit School ne kiwei kiwei ki Skul ruh kumjuh bad ba phin thawlad thaw lynti ruh ban mang post Nonghikai skul shuh shuh ha kiba kum kita ki skul khnang ba kan lah ban iarap iaki khynnah skul ban ioh iaki jinghikai kiba paka kumba ki dei ban ioh.
Ka KSU ka kyntu ruh iaphi ba phin sngewbha ban phah jurip ia baroh ki Government Schools ba don ha South West Khasi Hills District bad Mawsynram C&RD Block namar ki don bun naki kiba la jot rathai bad kiba donkam iaka sorkar ba kan phai khmat bad mang tyngka ban maramot na bynta jongki.
Kane ka skul ka dei kaba la mang daka Sorkar la jan 10 snem mynta ha Shnongkalong, South West Khasi Hills District. Kumba long mynta ka jingpyntrei ia kane ka skul ka la sahteng noh mynta la bun snem naka daw jongka jingbymlah ban pynsted iaka kam da ka Tnad Pule Puthi.
Kumta haba iadei bad kane, ngi sngewdei ban kyntu iaka sorkar ba ka dei ban pynsted noh halor kane ka bynta khnang ba kan long ka jingmyntoi iaki khynnah pule hapoh ka District hi baroh kawei.
Ka KSU South West Khasi Hills District na ka bynta ka jingkhuid jingsuba haka thungkam thungjam haki post Asst. Teachers haki Government Schools la ka long haka contractual ne Permanent post, ka sngewdei namar kata ban pynsngew hakhmat jongphi ba ka Education Department ka dei ban bud ryntih iaki kyndon( Guidelines for Minimum Qualifications) jongka National Council for Teachers Education ( N.C.T.E).
Kum ka seng ngi kwah ba ki nonghikai ba thung shipor ne ki nonghikai ba shah thung Pura ki dei la kumno kumno ba la dep iaka Diploma of Elementary Education ( D.El.Ed) , kiba la lait iaka Class XII( 45% aggregate) bad kiba don ruh iaka M.T.E.T Passed Certificate khnang ba kan nym buh kano kano ka jingeh iaki nonghikai bad iaki skul hapoh jongka District.
Kum ka seng, ngi kwah ban kren shai ba kan nym pdiang ia kano kano ka rukom thung nonghikai haki Government Schools lada ka iaid lait na kine ki kyndon jongka N.C.T.E khnang ba ka pule puthi hapoh jongka District bad ha Mawsynram C&RD Block kan kiew haki por bad ki snem ban wan.
