Shillong, Iaiong 10: Mynta ka sngi ha ka kyrteng jong u Lamphang ka iing dorbar thawain ka jylla u Thomas A Sangma, Secretary synrop u Malthus S Sangma u la ai ia ka kali Bolero sha u Dr. Wallambok Langstieh Project Director ka Meghalaya AIDS Control Society (MACS) ban dang pynkhlain shuh shuh ia ka jingiakhun pyrshah ia ka jingpang HIV bad AIDS.
U Lamphang ka iing dorbar u dei wei na kito kiba pynphriang ia ka khubor ban dang pynkhlain shuh shuh ia ka jingiakhun pyrshah ia kane ka jingpang HIV bad AIDS bad ia kane ka bynta dei ban iaid sha khmat ban ialeh pyrshah.
Ia kane ka kali yn sa aiti pat sha ka Meghalaya State Network of Positive People (MSNP+), ia kaba ynsa pyndon kam ia ka bad kane kan ai ka jingkyrshah ha kaba leit ban pynsngewthuh paidbah sha kylleng ka jylla ban iada na kane ka jingpang HIV bad AIDS la ong u secretary synrop haba aiti ia ka kali.
Ka jingthmu ban ai ia kane ka kali ka long ban kyrshan ia ka MACS ba kan leit sha ki nongkyndong ban pynsngewthuh ia ki paidbah namar ka long kaba eh ban shuh shim ia ka jingsumar tang ha Shillong, kane ka kali kan iarap ban poi ki lat jingiada sha ki nongkyndong.
Kane ka jingai ka long kaba rit hynrei kan iarap shibun ban leit sha ki nongkyndong ban pynsngewthuh ba kumno ban ia da na kane ka jingpang bad kane ka long shibynta na ka jingiakhun pyrshah ia kane ka jingpang HIV bad AIDS.
