Shillong, Nailur 11: Ka Federation Khasi State ka ai jingkhublei kaba kyrpang ia ka Dr Mazel Amapreen Lyngdoh kaba la wanrah mynta ka sngi hapoh iing dorbar thaw ain ka jylla ha kaba ia dei bad ka IOA bad ia ka AA.
Ka Federation of Khasi States, Ka Synjuk lang ki Hima, kiElaka hapoh Khasi bad Jaintia Hills. Ka Synjuk ka pynpaw ia ka jingsngew nguh ia phi halor ka jing wanrah ka jong phi hapoh iing Dorbar Meghalaya Assembly mynta ka sngi, ia ka jingtyrwa halor ka jingdonkam kyrkieh ban ioh ia ka jingiada kaba kyrpang hapoh ka Article 371 ka Constitution Ri India.
Ha ka nongrim ki kyndon ki dulir Instrument of Accession bad Annexed Agreement kaba la mynjur hapdeng ka Sorkar India bad ki Khasi States bad kaba la soi da u Governor General Shri. C Rajagopalachari, ha ka 17 tarik August 1948.
Ka Federation of Khasi States ka pynpaw ruh ia ka jingsngewnguh ia kiwei kiwei ki MLA ka iing Dorbar na baroh ar liang khlem da peit liang kiba la ieng ban kyrshan ia katei ka nongrim ban bsuh ia ki dulir Instrument of Accession bad khamtam ia ki kyndon ka Annexed Agreement (ki dulir jingiateh bad ki jingkular) hapoh ka Article kiba kyrpang hapoh ka Constitution Ri India.
Wat lada ia katei ka jingtyrwa ym shym la pdiang hynrei ngi sngew ioh mynsiem na ki kyntien maitphang jong phi hapoh iing Dorbar Meghalaya, bad ka 11 tarik September 2019, kan long ka sngi ka ban sah kynmaw namar ka long ka sien kaba nyngkong ha kaba kan don kum kane ka jingtyrwa ka jingiakren hapoh iing Dorbar ka jingtyrwa ia ka Article 371 ha ka Nongrim ki kyndon ka IOA & AA.
Kat haduh ba nalor kiwei kiwei ki dkhot ka liang pyrshah kiba kyrshan ia ka jingtyrwa la don ruh u Nongmihkhmat na ka liang synshar uba la ieng ban pynsngew sha ka Sorkar Jylla ia ka jingdonkam ban thaw ia ka Committee jylla kaba kyrpang ban bishar bniah ia kane ka kam kaba kongsan bha na ka bynta ka jingiada ia ka Ri Khasi.
Ka FKS ka ngeit skhem ba katei ka long tang ka jingsdang bad kan dang iai donkam bun ki jingiakren ki jingiasyllok khamtam hapdeng ki MLA, MDC bad MP ban ioh ia ka juh ka jingmut halor kumno ban bsuh ia ki kyndon kiba kyrpang hapoh ka Constitution Ri India ban iada ia ki Riti ki dustur jong ngi ka jaidbynriew Khasi bad Jaintia.
