Ka khasi Students’ Union lyngba ka Education Cell ka phah ïa kane ka kyrwoh jingai khublei sha baroh ki paradoh para snam na kylleng ka Ri khasi kiba la ïoh ïa ka result jong ki mynta ka sngi, kata ha ka HSSLC Examinations Commerce bad Science Stream.
Ka jingkhublei ba kyrpang ruh ka leit sha kito ki samla kiba la ïoh ban kheit ïa u soh ka jingjop da kaba wan kham sha khmat ha ki kyrdan bad subject ba ki pule. Ka jingïoh ban kheit jong phi ïa u soh ba thiang ha kane ka kynti ka long ka jingkmen ym tang ïa phi shimet hynrei ïa ka ïing ka sem, ka shnong ka thaw , ka Ri bad ka jaitbynriew hi baroh kawei.
Ka Seng ka da sngew sarong shikatdei eh ban ïoh i ba ki khun samla ka jaitbynriew ki wan shakhmat ha ka jingpule ka jong ki, namar ka jingnang jingstad, ka jingtip jingshemphang, ka dei ka atiar ba khraw ban ïada, ban pynneh pynsah bad ban kyntiew ïa ka Ri bad jaitbynriew ha baroh ki liang.
Kumjuh ka seng ka ai iaka jingkitbok kit rwiang sha kito ki samla ki bym shem la poi sha ka thong ha kane ka kynti, ba kin ym duh jingkyrmen, pynban, ba kin nang ïai trei shitom ba kin lah ban leh bha ha kawei pat ka kynti bad ba kin kynmaw ba ka jingshahrem kam dei ka lad ba khatduh hynrei ba kan long u mawjam sha ka thong Jong ka Jingjop.
Ka Seng ka ai ruh ka jingkitbok kit rwiang sha baroh ki samla ki ban sa ïoh ïa ka result ha kine ki sngi ki ban wan kata ka Examine HSSLC Examination Arts Stream bad ha ka SSLC Examination, ba kin ïoh ban kheit ïa u soh ka jingkmen u ban long ka jingsarong ïa ka Ri bad ka jaitbynriew hi baroh ka wei.
Ka Seng ka kyntu ruh sha ki samla ki ba la ïoh ïa ka result bad kumjuh ki ban sa ïoh, ba ki dei ban jied bha ïa ki bynta kiba ki dei ban pule, khnang ba kan nym sepei bad kan long kaba kham janai kat ba nang san ha ka jingpule.
Kyntang ïa wai ka Seng ka buh iaka duwai ka phirat sha baroh ki paradoh para snam ba kin ïoh ïa ka met kaba koit kaba khiah kumjuh ba kin ïoh ïa ka bor jabieng kaba khlaiñ, ba kin kiew ha baroh ki liang khamtam ha ka jingpule kaba kin nang iai bteng shuh shuh, kane ka long katkum ka kyrwoh kaba la phah da u samla Pynkmenlang Sanmiet shongknor ka Education Cell ka KSU.
