Shillong, Iaiong 18: Wat hapdeng kane ka saw ka sian na ka jingwan lynshop biang jong ka khlam ka ngoh, ka jingrakhe ïa ka Shad Suk Mynsiem mynta u snem kaba la long ha ka 10,11 bad 12 tarik, U Ïaiong, 2021 ha Madan Lympung Shad Weiking, Jaiaw, Shillong ka la long kaba ïaid beit, ïaid ryntih bad ba phuh ba phieng, ba da bud ryntih, kat kum ki kyndon ba la pynjari da ka Sorkar.
Kine baroh ngin nym lah lehse, ban pynurlong lymda dei da ka jingïa trei minot, shit rhem lang jong kito ki para nongkit kam jong ka Seng, kat kum ki kam ba la bynshet ha ki.
Kumta, ki pynpaw ïa ka jingsngewnguh ïa U Blei Trai Kynrad, Nongbuh, Nongthaw , U ba lah, U ba ïai U ba la sngew, la sngap ïa ki jingduwai, phirat, kyrpad, kyrpon naduh ka sngi kaba ki da ïa pan lymba ka khnong, ka bishar, kata; ha shuwa ban pynkiew ïa ka ksing, ka dhah ter-ter, haduh ka sngi ba pyn kut ne sngi khatduh jong ka shad, ka kmen ka jong ngi u khun Khasi-Khara, ba ksoh hala ka niam tynrai.
Ha kane ka bynta, ki pynpaw ruh ïa ka jingsngewnguh bad ai khublei ïa ka Sorkar Meghalaya, khamtam eh ïa U Chief Secretary ka jylla bad ïa Ka Deputy Commissioner, East Khasi Hills District kiba la ai jingbit ïa ngi ban pynlong ïa ka Shad Suk Mynsiem mynta u snem.
Wat hapdeng kane ka tyllep, ka tyrbun bad kumjuh ïa ka General Administration Department bad Ka Deputy Commissioner, Ri -Bhoi District kiba la pynbna shuti Shad Suk Mynsiem ha ka 12 tarik, u Ïaiong 2021 ha East Khasi Hills bad Ri-Bhoi District, ban rakhe pyndon burom ïa kane ka Shad, Ka Kmen ka jong ngi.
Ki nongialam seng khasi ki ai khublei kyrpang ruh ïa ki Executive Magistrates, Superintendent of Police bad jong ka Traffic, East Khasi Hills District ryngkat ki Officers bad Police Force ki jong ki na ka bynta ka security bad traffic control arrangement, kaba ki la leh ha kito ki sngi.
Kim lah ruh khlem da pynpaw ïa ka jingsngewnguh ïa kito ki nongkit kam na ki Tnad Seng Khasi, sor bad khapsor kiba la ïa wan ban ia snoh kti lang bad ngi bad aiti met bad mynsiem khlem da tyngkai, ban pynlong ïa ka Shad Suk Mynsiem ka jongngi ha baroh kitei ki lai tylli ki sngi, kaba iaid beit, ïaid ryntih, shong kun bad shongsbai.
La ai khublei kyrpang ruh bad ka jingsngewnguh ha ryngkat ka kyrkhu, kyrdoh ïa baroh ki para ‘riewseng na ki Jylli bad Tnad Seng Khasi bapher-bapher jong ka bri u Hynñiew Trep, Hynñiew skum bad kumjuh, ïa ki Tnad Seng Niam Khasi, Niam Tre, ki para kur, para kha, ki lok, ki jor na kane ka Mei Ri-lum, Mei Risan ka jong ngi bad ïa baroh kito kiba la ïa wan ban pynshngain ïa ngi bad ba la noh synñiang sha ka seng ka jongngi, ha kiba bun ki liang.
Na ka liang jong Ka Seng Khasi Kmie, ka ai khublei kyrpang ïa baroh bad pan map ba ngim , lah ban jer kyrteng ïa I wei pa I wei, hynrei, ngi phah shaphi ka kitbok, kit rwiang ba phin ïa ioh ka koit, ka khiah krat, khiah stang ban ïa roi , ïa pa ha man ki liang.
To U Blei Trai Kynrad Un nang theh sei kyrhai ki jingkyrkhu haphi baroh ba phin ïa lait na ka pang, ka jhia, ka jingit, ka ïap thngan, ka tyrsaw, ki jingma, jingmynsaw, ka tyrut, ka smer, ka raibi bad ba un map bad pyllait na ka bamsap, bampong, ka thok, ha thak, ka shukor, ka lamler bad ki pap, ki sang baroh, ba phin ïa im suk, im saiñ, parum, pareh, shong prah, shong shang.
Ka seng ka kitbok ban dang lah ban ïai bteng ban ïa kit, ïa bah lang ïa ka lyngkor jong kane ka Seng Khasi ka jong ngi kaba da ïeid ki blei, ha ki sngi- ki ïa ki ban nang wan bad ba U Blei Trai Kynrad, Nongbuh, Nongthaw na jrong, ha tbian, Un ri, Un da, Un ker bad don ryngkat lang bad phi baroh. To ngin ïa phira, sharai, pynsah, pynneh, pynheh, pynsan, pynksan la ka jong ho!
