Shillong, Nailur 07: U Bah Joh Kharshiing u la ai Khublei ia u Paiem Ainam Manik Syiem, Acting Syiem Mylliem bad ka KHADC ba lum Dorbar Hima Mylliem mynta ka sngi ha Madan Polo.
Namar ka jingkyrkieh jinglyngkot ka por ki la ai da ka dorkhast markhmat ha u Paiem Ainam Manik Syiem, Acting Syiem Hima Mylliem, ha kaba la ai khublei kyrpang ia u bad ka Dorbar ia ka jinglum ia ka Dorbar Hima Mylliem hadien 18 snem. Ka seng ai khublei kyrpang ruh ia u Bah HS Shylla, Chief Executive Member, KHADC bad ki dkhot ka Executive Committee, KHADC kiba la plie lad ban ioh ia katei ka Dorbar Hima kum shibynta ban pynim ia ka jaidbynriew Hynniewtrep.
Ha katei ka juh ka dorkhast kaba la ia soi da ki katto katne ngut ki khun ki hajar jong ka Hima Mylliem ki la ai jingmut halor ka jingdonkam kyrkieh ban pynbeit thymmai bad ban pynjanai ia ki Act bad ki Rule Hima Mylliem kiba kyrteng i) The Khasi Autonomous District (Appointment and Succession of Syiem, Deputy Syiem, Electors, and Rangbah Shnong of Mylliem Syiemship) Act 2007 bad ia ka ii) The Administration of Mylliem Syiemship Rules, 2015.
Halor ka jingklumar kaba sngewsih kaba la mih naduh ka 31 tarik Jymmang 2018 ha Iew Them Mawlong, Shillong hapoh Hima Mylliem, ka daw bah ka long ka jingbym don ka Land Policy kaba shai hapoh ka Hima Mylliem. Kum ki khun ki hajar ka Hima Mylliem ki dawa ba dei ban don ka jingshai na ka Dorbar u Syiem Hima Mylliem, halor ka rukom ai pata sha ki bym dei ki khasi hapoh Hima Mylliem. Mano bad kumno la ai ia kitei ki dulir khyndew da kaei ka lad ka lynti ban ioh pyrkhing ia ki rukom ai pata khlem tip ka Dorbar Hima baroh kawei.
La donkam ruh ban ioh jingshai halor ka hok u khun u hajar hapoh u pud u sam ka Constitution Ri India khamtam halor ka i) “Muncipality of Shillong” ii) “Shillong Administered Areas Municipality” iii) “Cantonment” bad iv) u pud ka Sixth Schedule ban sngewthuh ki bor aiu ba la pynkhamti ia ka “Municipal” bad “Cantonment” ha kaba iadei bad ka imlang sahlang ka khaii pateng bad ki jingtreikam ki Act Hima Mylliem hapoh kitei ki lai tylli ki jaid jaka kiba don hapdeng Sor ka Hima Mylliem.
La donkam ban batai shuh shuh bun ki bynta jong ka synshar khadar ka bishar Hima Mylliem ha kitei ki Act ki Rule khnang ba kin long kiba kham treikam khnang ba kin long pat kiba pynim ia u khun u hajar.kum ka nuksa la donkam ban ioh ia ka kaiphod kut snem man ka snem hakhmat ka Dorbar Hima, kumjuh la donkam ban ioh ia ka jingtip kaba shai halor ka jingmih (revenue) ka jingdon (assets) ka jingkhien jingdiah ( reciept and expenditure) kaba bniah (audited accounts) bad ban tip ia ka mang tyngka (budget) jong ka Hima Mylliem.
La donkam ruh kyrkieh ban ioh jingshai na ka Dorbar Hima Mylliem halor ki kyndon thaw iing, thaw iew, thaw shnong. La donkam ruh ban don ki kyndon kiba kham shai kumno ban lum Dorbar Kur, Dorbar Shnong, Dorbar Raid bad Dorbar Hima haba ki nongsynshar kim lum ia kitei ki Dorbar ki bapher bapher.
Shuh shuh la donkam ha kitei ki Act ki Rule ban don ki kyndon kiba bniah kumno ban pyniaid Dorbar bad ba ki khun ki hajar kin ioh ia ki jingiatai ki jingiakren ha kaba ki khun ki hajar kin phah lupa ki Resolution, ki jingkylli, ki phang jingiakren 40 sngi shuwa ban long Dorbar lehse lyngba ki Dorbar Kur, Dorbar Shnong ne Dorbar Raid hapoh ki Dorbar kum ba ki long hapoh ki Assembly, District Council ne Parliament Ka long kaba donkam ban buh shai ia kitei ki kyndon khnang ba kan pynsuk ia ki nongsynshar Hima Mylliem ba kin ioh pynkhreh ia ka Dorbar Hima kaba hun.
Shuh shuh ki kam kiba kyrkieh ki long ba katkum ka The Administration of Mylliem Syiemship Rule 2015 baroh ki Dorbar Shnong, ki dei buh ia ki Fund ki Account ha ki rukom kiba biang kaba mut dei ban plie ia ka Bank Account ha ka kyrteng jong Dorbar Shnong hynrei kumba ka long naduh ki Dorbar Kur, ki Dorbar Shnong, Dorbar Raid bad Dorbar Hima kim don lad ban plie ia ka Account hapoh Bank namar ka jingdkoh ka jingithuh da ka Constitution Ri India, bad ka jing tyngkhuh ha kaba iadei bad ki PAN Card, bad ka Ain Income Tax Act 1961.
Wat hapdeng ki jingduna kiba bun, kane ka sngi ka long ka jingsdang jong ka lynti ban pynim biang ia ka Hima Mylliem, ngi dap da ka jingsngewkmen bad ai khublei biang ia u Acting Syiem Hima Mylliem bad ka Dorbar kiba la lum la khot ia kane ka Dorbar Hima Mylliem.
Shuh shuh ki ai khublei ia u Bah HS Shylla, CEM, KHADC, uba la kular skhem ba nangne shakhmat baroh ki Dorbar Hima ki dei ban lum ia ka Dorbar Kut snem ha kaba shai ha ryngkat u Khun u Hajar bad ha kaba la kynthup lang ia ki Dorbar Kur, ki Dorbar Shnong, bad Dorbar Raid bad ngi long kiba kloi ban ai ka jingiatreilang na ka bynta ka Ri bad ka jaidbynriew khasi kaba kyrpang.
