Shillong, Iaiong 01: Ki Samla Pule ka North-Eastern Hill University (NEHUSU) bad ka Khasi Students’ Union (KSU NEHU Unit) kiba iatreilang ryngkat ryngkat halor kane. Ki la phah ia ka jingpynkynmaw, da kaba pan ia ka jingiarap kyrkieh ban weng ia ki jingeh bad ka jinglong jingman hapoh ka skul bah North-Eastern Hill University (NEHU).
Ha ka shiti ba la aiti sha ka myntri la pynpaw ba ka NEHUSU bad KSU NEHU Unit ki kyrpad jur ia ka jingkyrshan ha ka ban pynbeit ia ki jingeh kiba iai bteng bad kiba ktah ia ki samla pule, ki nonghikai ba la neh slem khlem da lah ban pynbeit.
Ka NEHUSU bad ka KSU NEHU Unit ka la iakhih pyrshah bunsien ia u Prof. Prabha Shankar Shukla namar ka jingbym lah jong u ban pyndep hok ia ki kamram jong u bad ka jingkynnoh ba u pyniaid bakla ia ki kam jong ka skulbah. Ban shu kdew.
ka NEHUSU bad ka KSU NEHU Unit ki la pynlong ïa ka jingshah thngan ha ka 5 tarik u Naiwieng 2024 bad la pynsangeh ïa ka jingshah thngan hadien ba la ai jingkular na ka Ministry of Education ba yn sa leh ïa kaba donkam.
Ha ka hukum ka ba mih ha ka 14 tarik u Naiwieng 2024, ka Ministry education ka sorkar India ka la thaw ïa ka Inquiry Committee ban tohkit ïa ki jingkynnoh. Ha ka jingleit jngoh jong ka komiti ia ka skulbah NEHU, ki seng ki la aiti ia ki kot ki sla kiba iadei bad ki sakhi kiba kyrshan ia ki jingdawa jong ki.
Shuh shuh, katkum ka shithi jong u Chairman ka Inquiry Committee ha ka 28 tarik u Naiwieng, 2024, ka bor ba dei khmih ka la ai por ban pynjlan sa 15 sngi ban pyndep ïa ki jinglap bad ban aiti ïa ka kaiphod.
Hynrei wat hapdeng ka jingleit jngoh jong ka komiti, ym shym la don kano kano ka jingkynthoh ne jingleh eiei kaba thikna, kaba la pynlong ïa ka skulbah ban don ha ka jingbym thikna bad jingbym sngewhun.
Da kaba pyrkhat ia ka jingjur jong ka jinglong jingman bad ka jingktah jur kane ka jingpyniaid bakla kaba la slem bha ia ka jinglong ba bit ba biang jong ka skulbah ha ka jingpule puthi.
Ka NEHUSU bad KSU NEHU Unit ka buh ka jingkyrpad bad ka jingshimkhia ban shim ki sienjam kiba rai ban pynbeit ia kine ki jingeh kiba kyrkieh ba la jia ha ka skulbah NEHU.
