Shillong, Jymmang 02: U Myntri rangbah ka jylla u Conrad K Sangma mynta ka sngi 2 tarik Jymmang 2026 u la pynlait paidbah ia ka kali kit metiap bala ai sha ka shnong Madanriting ha ka jingiadon lang u rangbah shnong, ki nongkit kam shnong bad ki paidbah nongshong shnong bad ki riew rangbah kum u bah Pyniaid Sing Syiem, MDC barim, bah Lambor Malngiang MLA barim, kaba la pynlong ha St, Peter Secondary School Madanriting.
Haba kren ha kane ka jingialang u myntri rangbah u la ong ba namar ba la ioh ia ka jingmynjur jong u Lat ka jylla ia ka Ordinance ban pynkylla ktien Sorkar ia ka ktien Khasi bad Garo kumta u la kren haba sdang ia ka jingkren da ka ktien Khasi bad Garo bud sa ka ktien phareng.
U myntri rangbah u la ong ba u don ka jingngeit ba kano kano ka jingai kaba rit, ki sien jam kiba rit bad ki jingithuh ia ki kam kiba rit ki don jingmut shisha, u la ong ba ha ka jingialang kaba la long ha Madan Student u la ia kynduh ia ki nonghikai skul SSA ha kaba palat phew hajar kila ia don.
U myntri rangbah ka jylla u la ong ba lada kwah ban wanrah ia ka jingkylla don kam ban pynleit jingmut ha ka pule puthi bad kata ka long ban hap peit ia ka bha ka miat jong ki nonghikai bad ka rai kaba ka sorkar kala shim ka dei kaba khia bha ia kaba ki sorkar kiba la leit kim shym la lah ban leh.
Kane ka rai kaba ka sorkar kala shim ka jinglut tam na ka sorkar kan long palat spah klur tyngka, hynrei ka sorkar ka shim ia kane ka rai ka long ban kyntiew ia ka imlang sahlang bad ha ka jylla ruh kum juh ka jingleh burom ia ka sokrar da ki nonghikai kala wanrah ia ka jingkmen namar kila pynpaw ia ka jingsngewnguh ia kaei kaba ka sorkar kala dep ban leh.
