Shillong, Lber 14: Ka Drug Reduction Elimination & Action Mission (DREAM) kaba dei ka tnad treikam ka Sorkar jylla ban ïakhun pyrshah ïa ka jingdih bad jingkhaïi drok ha ka jylla, haka 13 tarik u bnai Lber, 2025.
Kane ka jingialang la pynlong ïa ka jingïalang hapdeng ki Rangbah Shnong jong ki shnong bapher-bapher, ki nongseng ïa ki jaka ai sumar ne ki ‘Rehabilitation Centre’ bad ki nongïasyllok lane ki Counsellor ban ïathir-ïatai halor ka jingma jong u drok ha ki shnong-ki thaw.
Ïa kane ka jingïalang la pynlong ha ka Conference Room jong ka ophis treikam ka Social Welfare kaba don ha Lachumiere, Shillong ha ka jingdon ryngkat u Mission Director ka DREAM, u Bah Francis Kharshiïng bad u Superintendent of Police ka East Khasi Hills District, u Bah Vivek Syiem.
Ha katei ka jingïalang, ka la don ka jingpynsngewthuh, ka jingai jingmut bad ka jingpynsngew ïa ki jingeh ha ki dong-ki shnong ba kum ki nongïalam shnong ki mad bad iakynduh jingeh ha ka ba ïakhun ban tehlakam ïa u drok.
U Bah Vivek Syiem ula ong ba u khynnah hashuwa ba un ngop ha ka jingdih ïa u drok, bunsien u ju ngop shwa da kaba dih duma, u kynja nangta sa poi sha ka jingmad ïa u drok.
U la ong ba kum ki shnong-ki thaw ki donkam ban ïatreilang bad ki bor pulit ban tehlakam ïa u drok da kaba bynrap ruh ba ki don katto-katne ki shnong kiba ym kwah ban mih shakhmat hadien ka jingïohkurup jong ki ïa u drok namar ba kim kwah satia ban leit mih sha ki bor pulit ne wat sha ki ïingkashari namar ka jingshah pynbunkam hynrei kane ka jingleh pat kam lah satia ban ratdyngkhong ïa u drok.
