Shillong, Nohprah 21: Ka thaiñ Nongthliew ha syntai u Lum Diengїei ka dei ka raij hapoh ka Hima Nongkhlaw bad ka long kawei na ki shnong ki ba heh ka ba don ha ki hajar ki longїing longsem bad da ki phew hajar ki khun ki hajar.
Kawei na ki kyntoit ba lajer kum ka Laitarted ka dei ka shnong ka ba miat dur bha ki lum ki wah, ki lyngkha risai bad ka mariang sawdong sawkun. Ka dorbar shnong ka la ai jingbit їa ka Hynñiewtrep Youth Council (HYC), Nongthliew Circle ban buh nam їa ki khla ka wait jong ka Bri Hynñiewtrep da ka ba thung da ki mawbynna ha ka lympung ka ba dong ha kynjang bad shynna bha na baroh sawdong ki shnong ba marjan.
Naduh ka 16 tarik haduh ka 18 tarik ka la don ka jingpynkhreh ka ba iphuh iphieng ban rakhe artat їa ka lyngkhuh snem ba phraphew ban kynmaw tympang їa u Myllung Soso Tham. Ha kane ka rong ka taw ba ring mawbynna ka la don ka jingpynkhreh ban leit tan їa ki maw naduh ka shnong Kyrphei, Tyrsad na ka Hima Maharam shaduh Laitarted ha ryngkat ka ksing ka dhah bad ka phawar rwai shitrhem їa laka jaitbynriew.
U Kongsan ha kane ka rong ka taw, u Bah Robert June Kharjahrin, Khliehduh jong ka Sengkmie HYC u ba la kyntu kynpham їa ki samla ban ksan laka rngiew ha ka namjong ki khlawait ba mynnor ki ban long ka jingpyrsad mynsiem naka bynta ban shakri їa la ka Ri bad ka jaitbynriew.
La thung phra tylli kimawbynna ha ka rynsan ba la ker kyrpang ban tei їa u mot jong u Syiem Tirot Sing. U Kongsan u la kdew ba ki mawbynna kin thew ia baroh ki khlawait jong ka mynnor ki ba la aiti met ban mynsiem ban їada їa la ka khyndew bad ki khun ki hajar ki ba kynthup їa u Syiem Bormanik jong ka Hima Shyllong, Syiem Sngap Sing jong ka Hima Maharam, u Monbhut, u Lorshon Jaraiñ, ka Phan Nonglait bad kiwei kiwei ki riewshlur ki ba la їakhun pyrshah їa ki nongshun.
La sdang їa ka riti thung mawbynna da ka duwai ka phirat na u tymmen u san,Bah Hoping Khyllait, Seng Khasi bad la pynїaid їa ka jingїalang da u Bah Daniel Star Pathaw, u Symbud Saiñpyniar jong ka HYC, Nongthliew. Ki kynremki lyndan ki ba la їa donlang ki long u Kongsan Bah Robert June Kharjahrin, symbud kongsan, Bah Rhembor Saiborn, u symbud Khliehduh ka sengkmie HYC, ki longsan mansan shnong ba la lam khmat da u Bah Peter Anton Umwi bad u Bah Joplang Kharnaior, u Khliehduh jong ka seng HYC, Nongthliew; ki ba la kren shitrhem ha kata ka sngi ban ksan rngiew їa ka jingthmu ban tei mot їa ki riewkhraw jong kajaitbynriew.
Kumshi bynta jong ka rong ka taw, u kongsan Bah Robert June Kharjahrin u la pynskhem ruh їa ka shnat ki longkmie jong ka seng HYC, Nongthliew na ka bynta ban aikti lem їa ka lyngkor jong ki samla. Ia u mot jong u Syiem Tirot Sing, ka seng HYC ka la aiti ban shna da ki barikor jong ka Riti Academy.
