Shillong, Rymphang 0 3: U Chief Executive Member jong ka Khasi Hills Autonomous District Council (KHADC) u Bah P N Syiem, u la ong ia ki dkhot jong ka seng KSU mynta ka sngi ba lada ioh ne ym ioh ia ka NOC na ka tnad shan surok jong ka sorkar ka KHADC ka long kaba la kloi ban thep ia ka pisa T.25 klur ban maramot ia kane ka surok na Nongstoin sha Wahkaji.
Ia kane la kren da u CEM jong ka KHADC ha ki nongialam jong ka KSU seng kmie kaba la ialam da u Bah Daniel Khyriem president bah Auguster Jyrwa Genenral Secretary jong ka seng. Ka KSU kala pyrshah ia ka surok two lane namar ka ioh ba kane kan ialam sha ka jingtih Uranium sha katei ka thain bad ka KHADC ruh kan nym la ai shuh ia ka NOC ban shna surok, hynrei u CEM u la kular ban bei pisa T.20 klur ban maramot ia kane ka surok, hynrei mynta ka jingmang pisa ia kane ka surok kala poi sha ka T.25 klur.
U Bah PN Syiem ha ba kren ha ki nongthoh khubor ha dien jong ka jingialang u la ong ba ynda ka sorkar pdeng kala pynlait ia kane ka pisa, na ka liang jong ka Council kan sa phah sha ka State Level Committee ia ka mang tyngka kaba T.25 klur ban maramot ia kane ka surok, lada ka pdiang ne kam pdiang ruh ki long kiba la kloi ban thep ia kane ka pisa sha ka PWD ban shna ia kane ka surok.
La ong ba ka KHADC kala dep phah ia ka shithi sha ka PWD ba ka KHADC ka la mang pisa T.20 klur ban shna pynbha ia kane ka surok, hynrei na ka liang jong ka PWD kala kyntait ban ai ia ka NOC bad kala kyntu ia ka Council ba ka dei ban thep ia kane ka pisa sha ka PWD ban shna ia kane ka surok na Nongstoin sha Wahkaji.
U Bah PN Syiem u la ong ba ka KHADC ka long kaba la kloi ban thep ia ka pisa sha ka PWD, hynrei ka long kaba bakla ban ia pynibor ha pdeng jong ki namar ha kaba khatduh ka jingduh bad ka jingeh ki long ki paidbah.
U Bah Daniel Khryiem president ka KSU u la ong ba na ka liang jong ka KHADC ka long kaba la kloi ban sdang ia kane ka kam mynta u snem bad ka long kaei kaei kaba sngewtynad ba ka Council kala pynkiew ia ka jingmang pisa sha ka T.25 klur. Na ka liang jong ka KSU kam don jingsngew ei ei mano ban shna ia kane ka surok hynrei kaei kaba ki kwah ka long ba ia kane ka surok dei ban maramot na ka bynta ka jingmyntoi jong ki paidbah katei ka thain.
