Shillong, Kyllalyngkot 06: Ki pulit jong ka jylla kila trei shitom ban wad shaei u jah u Bah Julius Dorphang ban ioh ban kem ia u bad ban leit rah ia u sha poh ka iing bishar, hynrei kumba ka long haduh mynta ka sngi ki pulit ki dang don hapdeng ka umdum sha ei u don.
Ki thymmei khubor kiba la ioh da u SP News Agency la ong ba na ka liang jong ki bor sorkar mynta ki lah ban pynduh noh shipor ia ka passport jong u Bah Dorphang khnang bay n nym lah ban mih sha bar jong ka Ri India.
Ki thymmei khubor kiba ia jan bad ka Home Department jong ka sorkar jylla kila kwah ban leh ia kane bad mynta ki dang pyrshang ban thwet ia une u MLA jong ka Mawhati wat sha kiwei ki jylla jong ka Ri India bad lada kim lap kim ban se ban leh ia kane.
Ki thymmei khubor ki iathuh ba namar kane ka Non-bailable warrant kaba la ai da ka iing bishar lada ki pulit kim lap sha ei u don na ka liang jong ki pulit ki lah ban ai noh da ka “Red Corner Alert” sha baroh ki jylla namar mynta ka dang long tang ka jingpyntip sha kiwei ki jylla.
Na ka liang jong ki pulit kila shim khia ia kane ka kam ban wad ia une u MLA jong ka Mawhati u ba la shah kynnoh ba u la don kti ha kaba leh beijot ia ka khynnah rit kaba dang 14 snem. Na ka liang kong ki seng bhalang kin pynlong ia ka jingialang paidbah ha ka 11 tarik mynta u bnai ban pynbor ia ka sorkar ba ka dei ban kem.
