Shillong, Jylliew 02: U myntri rangbah ka jylla u Dr Mukul Sangma haba ia kynduh bad ki dkhot jong ka MEPA mynta ka sngi ha secretariat, u la ong ba ka sorkar ka kwah eh ban iarap ia ki lad pathai khubor ha kane ka jylla namar lyngba jong ki lah ban pyntip sha ki paidbah ia ka jingtrei kam jong ka sorkar.
Ha kane ka jingiakynduh na ka liang jong ka MEPA kala ai ia ka dorkhas sha u myntri rangbah kiba don 10 tylli ki mat jingiakren kaba ia dei na ka bynta ki trai kot khubor bad na ka bynta ka bha ka miat jong ki nongthoh khubor bad kito kiba don bynta ha kane ka kam kot khubor.
Ha kane ka jingiakren u myntri rangbah u shah skhor iaka jingkren jong ki nongialam ka seng MEPA bad ha dien ka jingiakren la shim ia ka rai ban thaw ia ka committee kaba kyrpang ban ia kren ia kane ka kam namar ki don kam ban peit bniah ba kaei kaei baroh kaba ka sorkar ka leh kan long na ka bynta ka jingmyntoi jong ki paidbah.
Ha kane ka jingiakren na ka liang jong ka MEPA la lam khmat da u Bah Philip Marwein Genenral Secretary la don lang u president bad ki dkhot jongka seng, katba na ka liang jong ka sorkar la don lang ka myntri pynroi sor, ka kong Ampareen Lyngbdoh bad u myntri ba deipeit ia ki kam pathai khubor u Bah AL Hek.
