Shillong, Nailar 04: Ka Central Executive Council (CEC) jong ka Khasi Students’Union ha ka jingialang ba la shong ha u 29 tarik Jylliew 2019 ha ophis treikam jong ka seng ka la rai ban pynrung dkhot shuh shuh sha ka CEC kum shi bynta ban pynkhlain bad pynjanai ia ka jingtrei kam ka seng ban shakri ia ka Jaidbynriew.
Ha katei ka jingialang, ka iing baroh kawei, kata baroh ki dkhot ka CEC ki la mynjur ban pynrung dkhot noh sha ka CEC ia u samla Iashanborlang Mukhim uba dei u nongialam ka KSU Malki Circle.
U samla Reuben Najiar uba long u nongialam ka KSU Laban Cirlce bad dkhot barim ka KSU NEHU Unit, u samla James Hitler Mawphniang uba long u nongialam ka KSU North Khasi Hills District Unit bad uba dei ruh u president barim ka KSU NEHU Unit bad u samla Pynkmenlang Sanmiet uba dei u nongialam ka KSU Shella Unit ha ka juh ka por ruh uba long u President ba mynta jong ka KSU NEHU Unit.
Lyngba kane ka kyrwoh ka KSU ka pyntip ba nangne shakhmat ia kitei ki saw ngut yn ithuh noh kum ki dkhot bad nongialam ba pura jong ka KSU Central Executive Council.
