Shillong, Nailar 26: U Myntri rangbah ka jylla u Conrad K. Sangma mynta ka sngi 26/Nailar/2026 u la plie paidbah ia ka “CM Impact Read and Rise” Meghalaya ha Annex Halls ha Assembly ha ka jingdon lang ki khynnah skul ka thain Laban.
Haba kren ha kane ka jingialang plie ia kane ka Read and Rise Meghalaya u myntri rangbah u la ong ba ka jingthmu jong kane ka long ban pynshlur ia ki khynnah haduh hynniew snem ba kin nang ban pule bad haba ki nang ban pule ka jingmyntoi kan long ia ka jylla.
Haba phai sha ka tnad pule puthi u myntri rangbah u la ong ba ka sorkar kala buh ia ka tnad pule puthi ha khmat eh ban pynbha ia ka, u la ong ba kane ka dei ka tnad sorkar kaba jwat bha ban pynbeit namar kine kila sah sohkyrdot da ki bun phew snem.
Na ka liang jong ka sorkar kam shym la kynran dien hynrei ka sdang ban pynbeit kawei ka jingeh hadien kawei pat, u myntri rangbah la ong ba ka sorkar ka khlem kam ba ki lah lut, ki dang don shibun ki jingeh kiba dang hap ban pynbha.
Kum kane ka jinghikai ka lah ban long ba ka jylla Meghalaya ka dei kawei na kiba nyngkong ha ka Ri India, ia kane ka jinghikai la pynwandur katkum ka jingstad saian kaba mynta bad ha ka rta kaba hynniew ki khynnah kila lah ban pule bad thoh, ia kane ka jinghikai yn sa lah ban ioh ia u soh hadien shiphew snem ne tam naduh mynta ka sngi.
Ha kane ka sngi la don lang ruh u myntri ba dei peit ia ka tnad pule puthi u bah Lahkmen Rymbui, u Commissioner ka tnad pule puthi, ka Director ka tnad pule puthi bad kiwei kiwei ki ophis ka sorkar jylla ha ryngkat ki khynnah skul bad ki nonghikai.
