Shillong, Nailar 27: Ka Dorbar Ki Waheh Kur Ri Jaintia ka la long ha Amlarem ha ka 26tarik Nailar, 2024 ha ka ba ki rangbah kur na kylleng ki la pynshai paidbah shaphang ka longkur longkha ha ka titi dustur tynrai naduh kulong kumah. Baroh ki rangbahkur ki la pynsngew ba donkam ban pynneh ia ka riti kheiñkur kheiñkha na ka kmie kumba la ju long pateng la pateng naduh ki longshwa manshwa.
U Khliehduh jong ka Dorbar Ki Waheh Kur Jaintia, Bah Khroo L Pariat u la pynkynmaw ia ki kur baroh ba ki dei ban seng noh la ki dorbar kur bad ban kyntiew bui ha ka Jaintia Hills Autonomous District Council khamtam ia ki kur baroh ki ba kham kynrei sha thaiñ Jaintia.
U la batai ruh shaphang ki rukom kheiñkur kheiñkha ki ba dei ban kynmaw ia ki ba iateh kur ba kin shim khia na ka bynta ban lait na ka shong sang. U Khliehduh jong ka Synjuk Ki Rangbah Kur: Ka Bri U Hynñiewtrep u la iathuh ia ka jingsdang jong ka ba seng ia ka ba la lamkhmat da u Bah H S Shylla bad haduh ba la nang kiew irat ban mih ki shnat ha East Khasi Hills, West Khasi Hills, South West Khasi Hills, Jaintia Hills bad Ri Bhoi.
Kiwei kiwei ki ba la kren ha ka dorbar ki long u Bah Rapionglang Blah bad Bah Erwin K Syiem Sutnga ki ba dei ki dkhot rangbah na ka seng kmie ka Synjuk Ki Rangbah Kur.
Kine ki arngut ki rangbah ki la maham ia ki kur tynrai ba ki dei ban tehsong na ka jingwan tyllep ki bor sorkar ki ba lah ban pyntroiñ bad iuhroit lada ym kyndit bynriew ban aibor ia la ki shlem tynrai ban iada ia ka imlang sahlang.
U Bah Rapionglamng Blah u la pynkynmaw ba ka la don teng ka jingpyrshang na u nongbishar rangbah S R Sen ban pynduh bor ia ki dorbar shnong bad u Bah Erwin K Syiem Sutnga pat u la sot ia ki aiñ ka Ri India ki ba la wanlam da ki kyndon aiñ ki ba lah ban tyllep noh ia ki riti dustur tynrai jong ka jaitbynriew. Baroh lang ki rangbah kur ba la ai jingkren ki la ban khia ba dei ban pynneh ia ka District Council kum ka iktiar ban iada ia ki deiriti tynrai jong ka jaitbynriew salonsar.
Nalor kata, ka Dorbar Ki Waheh Kur ka la pynithuh ruh ia uwei na ki rangbah kur, Bah Raphael Warjri, u ba la thoh ka kot shaphang ka riti kheiñkur kheiñkha Khasi ha ka ktien phareng, ha ka ba u la ai jingkren lyngkot ia ka kot ba dang pyllait shen bad ba la pyllait paidbah biang da u Bah Khroo L Pariat ha Amlarem na ka bynta ki paidbah ka Ri Jaintia.
U Bah Raphael Warjri u la pyntip ruh ba la dep thoh ha ka ktien Khasi ha ka ba yn sa pyllait shen da ka INTACH, Meghalaya Chapter. Ha ba la kynthoh shaphang ka ba pyllait ia ka kot Mei: Matrilineal Exogamous Institution tang da ki shynrang suda, khlem kynthup wat tang iwei ruh I longkmie.
U bah Raphael Warjri u la kdew mardor ba ka la don ka jingiasyllok ban pyllait da kino kino ki longkmie, hynrei ka longkmie ka ba dei ka khliehduh jong ka INTACH ha jylla, ka Kong Madeline Tham ka la kren khia thew ba ka kyrkhu kyrdoh na la rympei la pyndep da ka longkmie ha ba la synñiang na ka bynta ban pynmih ia ka kot bad u nongthoh ruh u la buh ha ka thup jong ka INTACH shwa ban pyllait paidbah.
Kane ka dei katkum ka dustur tynrai Khasi ba ka kmie ka kyrkhu kyrdoh ha la rympei bad ki longkñi ki kit ki bah ia ka kam shabar na la rympei kum ki khun dap shynrang I Mei.
Kumta ki khlieh rangbah jong ki Dorbar Dalariti jong ka thaiñ shatei lammihngi ba la lamkhmat da u Bah Pyniaid Sing Syiem, CEM KHADC, ki la ksan rngiew ha ba ki la synrop lang bad u Bah Prestone Tynsong, Symbud Myntri Rangbah na ka bynta ban pyllait ia ka kot MEI, ki ba long kum ki longkñi ha ka jylli synshar ban iada ia ka riti dustur ha ka thaiñ bad ha jylla.
