New Delhi, Iaiong 10: Ha ka sienjam kaba khlain, ka Election Commission of India mynta ka sngi ka la bthah ia baroh ki Jylla bad UT ba kin bthah ban pyni ia ki printer bad ki publisher jong ki jingpyntip kiba iadei bad ki kam sain pyrthei kiba kynthup ia ki hoarding, khnang ban don ka jingshai ha ka rukom pynlut pisa ha ki kam syllok ia ki nongjiednongmihkhmat.
La shim ia kane ka rai da ka Commission kaba kynthup u Chief Election Commissioner Rajiv Kumar, bad ki Election Commissioner Gyanesh Kumar bad Dr Sukhbir Singh Sandhuhadien ba la ioh pdiang ia ki jingujor ha ka Commission kiba ong ba la iohi ia ki jaka buh hoarding ba pyniaid ia ki bor Municipal, ki hording ki bym pyni ia ki printer ne publisher.
Ka Section 127A jong ka Representation of the People Act, 1951, ka manaia ka jingpynmih ia ki kot kiba iadei bad ki kam sain pyrthei, ki placard lane ki banner khlem da pyni shai ia ka kyrteng bad ka jaka treikam jong u publisher ne printer.
Kane ka jingdonkam ban pyni ia ka kyrteng jong ki publisher ka long ka mat kaba kongsan ban peit ia ka rukom pynlut pisa ha ka jingsyllok ia ki nongjiednongmihkhmat bad ka jingbuh ia ka jingbahkhlieh lada ka khubor ka long ka bym iahap bad ka Model Code of Conduct lane ki kam ba la mana.
Lah ban shu kdew hangne ba u CEC Rajiv Kumar u la kdew sha ka jingdonkam ban pynbeit ia ka jingpynsaphriang ia ki khanalamler kum kawei na ki jingeh ha ryngkat ka jingpyndonkam ia ka Pisa bad ka Bor, ha ka jingpynthikna ia ka jinglong ryntih ka jingiakhun.
Da kane ka jingbthah, ka Commission ka la buh ia ka jingbahkhlieh ha ki printer, publisher, licensee bad kontraktor jong ki bor pyniaid shnong kiba ai wai ia ki jaka buh jingpynbna kiba iadei bad ki kam sain pyrthei kiba don ha ki jaka paidbah.
Kane ka long ka jingbteng jong ka jingai jingmut ba dang shen jong ka ECI lyngba ka kyrwohha ka 02.04.2024 sha ki editor jong ki kotkhubor ba kin long kiba husiar haba ki pynmih ia ki jingpynbna kiba iadei bad ki kam sain pyrthei ha ki kotkhubor jong ki.
La phah ruh ia baroh kiba iadon bynta ha kine ki kam ba kin peit ia ki jingbthah ba la ai da ka Municipal Corporation of Delhi (MCD) ha ka 03.04.2024 sha baroh ki licensee bad ki contractor jong ka halor ki jingpynbna ha ki jaka paidbah jong ka MCD.
Kine ki jingbthah, katba ki shah ia ki jingpynbna kiba iadei bad ki kam sain pyrthei kiba kyrshan ia ki seng sain pyrthei bad kyrtong, ka khangia ki jingpynbna kiba kynthoh ia kanokano ka seng sain pyrthei ne kyrtong.
La mana ruh ban don kanokano ka jingpynbna kaba iadei bad ki kam sain pyrthei kiba la pynmih ha ka jinglut jingsepjong ka Sorkar kiba iadei bad kanokano ka seng sain pyrthei bad sorkar kaba don ha ka bor.
Baroh ki jingpynbna kiba iadei bad ki kam sain pyrthei ki dei kiba lah ban pyndonkam tang hadien ka certification bad jingioh jingbit jong ka bor ba la buh kyrpang ban ai jingbit ia kum kine ki jingpynbna.
