Shillong, Nailur 17: Ka JAC Dong Namchiang, Elaka Narpuh, East Jaintia Hills District, ka dawa jur na ka Sorkar bad na ka NHIDCL ba kin maramot noh ia ka surok NH6 naduh Tongseng haduh Ratacherra Malidor.
Namar kumba long mynta ki paitbah ba bun balang ki la jynjar palat man la ka sngi ka dheng kali na ka daw ka jingsniew palat pud jong ka surok sa tang ki krem baheh baheh hapdeng surok.
Bad mynta lah dei ka por ba rang slap, ka la ktah haduh katta katta ia ka koit ka khiah jong ki nongleit nongwan bad ki nongshong shnong khamtam ki khynnah skul namar ka surok ka la dap da ka pum pum.
Bad na ka liang jong ngi ka JAC naka por sha ka por ngi la iai ban bad kyntu ia ka NHAI bad NHIDCL ban maramot noh ia kane ka surok, hynrei ka jubab ka ngi ioh ka long ba ki dang pyntrei ia ki nala (sidedrain).
Bad katkum ka jingiohi jong ngi ka JAC ba ka jingtrei kam jong ki ka suki palat bad lada iai ap haduh ban da dep ka Nala, ka mut ba ki paitbah kin iai mat ia ka jingeh ha ka leit ka wan na ka daw ka jingbym shimkhia jong ka NHAI.
Bad na ka liang ka JAC ngi dawa jur ba ka NHAI ka dei ban pyndap ia ki krem and thliew ha shilynter u surok katba dang iaid ka jingshna nala. Bad ha ka juh ka por ban pynkloi noh ban ai rong (blacktopping) khnang ba kan pynsuk ia ka leit ka wan jong ki paitbah.
Bad lada kane ka jingdawa jong ki kam urlong hapoh ar taiew ngin sa shim biang ia ka jingiakhih paitbah, kane ka long katkum ka kyrwoh kaba la phah da u bah Lasting Pala shongknor ka JAC Dong Namchiang.
