Shillong, Risaw 22: U Director ka tnad ka koit ka khiah u Dr Aman War mynta ka sngi u la pynsngew ba ka sorkar ka dang pynkhreh ban pynrung ia ka jingtest COVID-19 ha ka kard Meghalaya Health Insurance Scheme (MHIS).
Haba kren ha ki lat pathai khubor la iathuh ba ka jingialeh ka sorkar ban pynrung ia kane ka jingtest COVID-19 ka long namar ba ki briew kiba leit shah sumar ha ki Hospital, la hap ban test COVID-19 ha ka por ba ki rung sha ki jaka ai jingsumar bad kumba ka long mynta kane ka jingtest kam don hapoh katei ka MHIS Card.
U Director u la iathuh ba naduh ba ka sorkar kala phah siew ia ka bai test COVID-19 ka jingwan test jong ki briew kala duna shibun, na ka liang jong ka sorkar mynta ka dang wat ia ki lat ki lynti kumno ban pynrung ia kane ka jingtest COVID-19 hapoh jong ka MHIS kard.
Katkum ka rai jong ka sorkar ka long ba naduh ka 16/10/2020 ka sorkar kala shim ia ka rai ban phah siew noh ha kaba ia dei bad ka jingtest COVID-19 bad kane ka jingphah siew ka long tang ia kito ki long iing kiba la ithuh kum kiba la biang ka ioh ka kot, katba ia kito ki long iing kiba la ithuh kum kiba duk ka sorkar ka dang test ei na ka bynta jong ki.
Kane ka jingtest ei ka long tang lada ki leit sha ki jaka ai jingsumar jong ka sorkar la dei ki nong iing kiba la ithuh kum kiba duk, hynrei ia kane ruh lada ki leit sha ki jaka sumar jong ki riew shimet ka sorkar kam shym la bah khlieh ia ki. Ban pynsuk ia ki paidbah ka sorkar kala wat ki lat ki lynti kumno ban pynrung ia kane ka jingtest COVID-19 ha ka MHIS kard.
