Jowai, Jylliew 22: Ka AJYWO Central Body, ka pynpaw ia ka jingkthang kaba jur halor ki jingeh kiba ki samla pule jongka Ri Jaintia ki ia kynduh ha Kiang Nangbah Govt College Jowai.
“Ka jingiakynduh jingeh ki samla pule jong ka Ri Jaintia man la u snem ha Kiang Nangbah Govt. College Jowai kam dei shuh ka jingjia kaba dang thymmai hynrei kaba lah slem bha. Khamtam lei mynshem snem, da ki phew ngut ki samla pule ba lui lui na Jaintia Hills ki la mynsaw ha ka nongbah Jowai halor ka jingialeh ba jai jai jong ki ban ioh ia la ka jong ka hok ha ka pule puthi. Ha ha ka jingshisha, ka ka sorkar ka la dei ban leh ei ei naduh ki por mynshuwa, khamtam lei naduh mynshem snem ba la jia kato ka jingjia hynrei imat ka sorkar Meghalaya kam pyrwa ia kane ka jingeh jong ki samla pule na Ri Jaintia bad kane ka la pynkthang shi katdei eh ia ka seng”, ong u Bah M H Dkhar President jong ka AJYWO Central Body.
“Ki khun samla ki dei ka lawei jong ka Ri bad ka Jaidbynriew bad ruh jong ka jylla hi baroh kawei. Ka jingnang jingstad kaba thikna na ka bynta jong ki ka dei u shabi na ka bynta ka lawei jong ki. Lada khlem ki khun samla bad khlem ka jingnang jingstad kaba biang kaba ki dei ban ioh, shano ka lawei jong ki bapli bad jong ka jylla?,” ong shuh shuh u Bah Dkhar.
U Bah M H Dkhar u la ong shuh shuh ba ka jingbym shim khia jong ka sorkar jylla ban thaw ia ki lad ki lynti kiba kyrkieh halor ka jingeh kaba ki khun samla pule jong ka Ri Jaintia ki ia kynduh ha Kiang Nangbah Govt College, ka dei ka jingibein jong ka ia ka Jaintia Hills bad ruh iaka lawei jong ki samla pule jong ka. Imat ka tnad pule puthi jong ka sorkar Meghalaya kam don ia ka jngiohi jngai lypa ia ki hajar ngut ki samla pule jong ka jylla ki ba mih man la u snem na Ri Jaintia, ne ba ka sorkar hi kam kwah ban leh ei ei na ka bynta ka bit ka biang jong ki.
U tei u nongialam jong ka AJYWO u la ong shuh shuh ba ha ka jingshisha ka sorkar ka dei ban shim ba nalor ka koit ka khiah ka ba biang ia u nongshongshnong jong ka, ka jingnang jingstad kaba thikna bad ka ba biang ia ki samla pule jong ka, ka dei ban long kaba ha khmat eh bad ba ka sorkar ka la dei ban shim khia bha katba lah ban pynthikna ba ki samla pule kim dei ban ia kynduh jingeh ha ki jingpule jong ki bad lada jia ba ki ia kynduh ruh, ka dei ban weng noh shisyndon ia ki ba kum kita ki jingeh jongki hynre ka sorkar jylla kam shym la leh ia kane bad dei namar kane ka daw ba da ki spah ngut ki samla pule na Ri Jaintia ki ia kynduh jingeh ha ka Kiang Nangbah Govt College manla u snem.
Ka AJYWO ka dawa na ka sorkar jylla ba halor ki jingeh kiba ki khynnah samla pule jong ka Kiang Nangbah Govt College ki ia kynduh, ka sorkar jylla ka dei noh ban shim khia wut wut bad ba kam dei shuh ban dang pynslem bad ialeh kai bad ka lawei jong ki namar ka por mynta kam don shuh. Ha ka jingshisha kitei ki khynnah ba pli ki la dei ban ioh shong klass noh naduh mynno lada jia ba ka sorkar kan jin da la shim khia ia ka jingeh jong ki naduh ki por ba la dep.
