Shillong, Nailar 24: Haba kren kum u kongsan ha ka jingïalang pynshlur ïa ki khynnah pule ka skul miet, Ka Shlem Kyntiew Jingtip Evening School, Mawphlang ha Mawphlang U Bah Lamphrang Blah, MDC ka Mawphlang-Diengïei Constituency u la pynpaw ba ka jingstad ka dei ka atiar ba khlaiñ bor tam ban rat dyngkhong ïa ka jingduk.
Ha ka jingkren u la pynpaw ruh ka jingïaroh ïa ki nongpynïaid skul; watla ka dei tang ka skul miet hynrei ka la long pat ka jingkyrkhu ïa ki khynnah pule kiba don ha ka kutlad ban bteng ïa ki jingpule ha ki skul sngi namar ka jingduk.
U la kyntu ruh ïa ki khynnah ba kin trei shitom bad ban don ka mynsiem len lade khnang ban kynjoh sha ka thong ka jingjop, watla ki dei ban mad jingeh ha kaba ki hap ban leit bylla shuwa mynsngi ban pyndap ïa ka jingdonkam ka ïing.
Ha kane ka jingïalang, la ïoh ruh ka jingkyrkhu kyrdoh na u Bah H. Kharshiing, Myntri ka Hima Mawphlang. Haba ai jingkren u Myntri u la kyrpad ïa ki kmie ki kpa bad ki nongsumar ïa ki khynnah ba kin ïarap lem ïa la ki khun khnang ba kin kot sha ka thong bad ïa ki khynnah ba kin long kiba ïaineh hapdeng ki jingeh.
La ïoh jingkren ruh na u Bah Tambor Lyngdoh uwei na ki dkhot ka Mawphlang Educational Development Committee (KSKJ) ka seng kaba kyrshan ïa kane ka skul, ha kaba ula batai ïa ka jingïaid shaphrang ka skul naduh ba la seng ha ka snem 2004.
Ha kane ka jingïalang la ïoh ruh bun ki jingkren na ki riew rangbah ka shnong Mawphlang bad ki thaiñ ba marjan; kita ki long u Bah B. S. Nongkynrih, Bah T. Rapthap, Bah M. Blah, Bah M. S. Kharshiing, Bah P. R. Kharshiing bad Kong B. Jyrwa.
Ha kane ka sngi la ai sngewbha ruh ïa ki khynnah pule kiba pas bha ha ka eksam SSLC 2018 bad ka jingai jingïarap sha ka skul da u Kongsan bad kiwei ki riew rangbah kum shi bynta ban kyntiew ïa ka skul. Kiba la sakhi lang ha kane ka jingïalang ki long ki nongsynshar ka Hima Mawphlang, ki rangbah shnong, ki riew rangbah, ki dkhot ka KSKJ (MEDC), ki nonghikai, ki khynnah pule bad kiwei.
